Буряад Уласай Арадай Хуралай Түрүүлэгшэ Владимир Павлов Буряадай прокуратурын коллегидэ хабаадаба. 2021 оной дүн гаргалга болон 2022 оной түсэб зорилгонууд тухай тэндэ хэлэгдэһэн байна. Владимир Павлов үгэ хэлэхэдээ, үнгэрһэн жэлдэ прокурорнууд эршэтэйгээр хүдэлөө гээд тэмдэглэбэ. Хуули ёһо сахиха, уласай ниигэмэй-экономикын хүгжэлтын болон ажаһуугшадай байдал һайжаруулха талаар ехэ ажал хэгдэһэн тухай хэлээ.
Үндэһэн түсэлнүүдтэ һомологдодог бюджедэй мүнгэ зүбөөр хэрэглэлгэ, гэр байшангуудые капитальна заһабарилга хэлгэ, аюултай гэрнүүд сооһоо хүн зониие зөөлгэ, эмнэлгын туһа шанартайгаар үзүүлгэ, эм домоор хангалга, бог шоройн асуудал гэхэ мэтэ бэрхэшээлнүүдтэ прокурорнууд тон ехэ анхарал хандуулһан байна.
-Пандемиин үедэ олзын хэрэг эрхилэгшэдэй эрхэ хамгаалха талаар прокурорнууд олон аргануудые абаа. Буряадай эрхэтэд хандажа, өөһэдыгөө хамгаалха тухай хэлэнэ. Хүн зон танда ехэ найдалаа түрүүлжэ, туһа эринэ ха юм, - гэжэ Владимир Павлов хэлээ.
Мүн тиихэдэ экологиин, ЖКХ-гай үнэ сэнгэй, үйлэдбэридэ аюулгүй байдал сахилгада, хуули бусын ябадалнуудые элирүүлгэдэ прокуратурын талаһаа ехэ анхарал хандуулагдадаг тухай тэмдэглэһэн байна.
Уласай прокуратура саг үргэлжэ хуули нарижуулха талаар үүсхэл Арадай Хуралда оруулжа байдаг юм. Жэшээнь, нёдондо жэл гэртэхинэй харууһагүй үлэһэн үншэн хүүгэдые дэмжэхэ тухай хуули абтаа. Коллеги дээрэ үхибүүдые элүүржүүлгын талаар амаралта тухай асуудал мүн лэ хэлэгдэһэн байна.
Арадай Хуралай һунгамалнуудай зүгһөө Владимир Павлов уласай прокурор Галина Ковалёвада болон прокуратурын бүхы мэргэжэлтэдтэ үнэн сэхээр ябуулдаг гүрэнэй ажалайнь түлөө баяраа мэдүүлээ.
