Буряад орон дотор аяншалгын объектнүүдтэ ошодог харгынуудые нормативна эрилтэнүүдтэ тааруугаар заhаха болобо. «Аюулгүй, hайн шанартай харгынууд» гэжэ түсэлэй ашаар бэелүүлэгдэжэ, харгын hайн шанартай болоходо, архитектурын хүшөөнүүдтэ, байгаалиин заповеднигуудта, үзэсхэлэнтэ hайхан газарнуудта зон хүрэхэ аргатай болохо.
-Улаан-Yдэ хотодо харгын ажалшад Υбэр Байгалай хизаарай арадуудай угсаатанай музей ошоhон харгы заhабарилха. Энэ хадаа гансашье аяншалагшадай дуратай газар бэшэ, харин хотын, уласай зон эндэ ехэ дуратай олоороо ябадаг, - гэжэ Транспорт, элшэ хүсэ ба харгын ажахы хүгжөөлгын яаманай мэдээсэлэй албан дуулгана. «Түмэр Морин» дэлгүүрhээ Зүүн зүгэй эмшэлгын түб ошодог харгы хүрэтэр заhабарилгын ажал хэгдэхэ. Энээнhээ гадна, Улаан-Yдэ хото соо Карл Марксай бульвар дээрэ 1 км харгын заhабарилга түсэблэгдэнхэй. Эндэ харгы Н.Бестужевай нэрэмжэтэ Ород драмын театр болон «Мэргэн» гэжэ хүшөөдэ хүрэдэг.
Yндэhэн түсэлэй hайгаар үшөө Комсомолькая гудамжа заhабарилгада орохо. Энэ харгы «Хилын харуулшад» гэжэ сквертэ хүрэдэг. Эндэ герой Николай Петровай хүшөө табигданхай. Энэ багахан сэсэрлиг соо хотынхид амарха дуратай, эндэ элдэб хэмжээ ябуулганууд үнгэрдэг. 2007 ондо арад зоной ба ламанарай хүсөөр баригдаhан Буддын шажантанай «Гандан Жамба Лин» дасанда Красногвардейская ба Заудинская үйлсэнүүдээр ошодог. Эдэшье баhа түсэлдэ оронхой, тиимэhээ энэ жэлдэ шэнэлэгдэхэ.
