«ProДФО-Yбэр-Байгалай хизаар» гэжэ онлайн-форумай пленарна суглаан дээрэ нёдондо жэлдэ Буряад Уласта түсэблэгдэhэн «Формирование комфортной городской среды» гэжэ бүхы түсэлнүүд бэелүүлэгдээ гэжэ Буряад Уласай толгойлогшо Алексей Цыденов тэмдэглээ. Энэ жэлдэ 182 ниитын газар болбосон түхэлтэй болгохын түлөө дуугаа үгэлгын хэмжээ ябуулгада 84 hууринууд хабаадана.
- Олон хүн зон дуугаа үгэлгэдэ хабаадаха, ямар дизайн-макет hанаанда тааруу байнаб гэhэн өөрынгөө hанамжа мэдүүлхэ гэжэ найданабди. Тиимэhээ зонтой харилсалга - хотын болбосон түхэлтэй байдал тогтоолгын гол шухала эрилтэ болоно,- гэжэ Алексей Цыденов онсолон тэмдэглээ.
2017 онhоо мүнөө саг болотор Буряад Улас дотор 487 гэр байрын хажуудахи болон ниитын 100 газарнууд болбосон түхэлтэй болгогдоо. 2021 ондо үшөө 100 ниитын болон 122 гэрнүүдэй дэргэдэхи газарнууд болбосон түхэлтэй болгогдохо. Энээнэй хажуугаар манай уласай хотонууд Бүхэроссин мүрысөөндэ эгээ hайн түсэлнүүдээрээ шалгараа. Энэ хадаа, Хяагта, Галуута нуур, Захаамин, Хойто Байгал, Бабушкин хото болоно. Энэ хэмжэээ ябуулгада хамта дээрээ 289 миллион түхэриг hомологдоно.
