Арадай Хуралай суглаан дээрэ загаhанай ажахын ерээдүйн хүгжэлтын хараа, тэрэнэй орёо асуудалнууд тухай зүбшэн хэлсэбэ. Хүдөө ажахын хорооной түрүүлэгшэ Дмитрий Швецов эгээ шухала асуудал - омоли загаhа үдхэлгын үйлэдбэри байhан зандань үлөөлгэ тухай онсолон тэмдэглэбэ. «2017 онhоо Байгал далайда омоли загаһа бариха хорюул табигданхай. Энэ хорюул Байгалай эръе дээгүүр ажаhуугшадай байдалда ехэ нүлөө үзүүлнэ. Хэзээ энэ асуудал шиидхэгдэхэб, зон хуушан ажабайдалай гуримда орохоб гэжэ бидэ харюу абаха ёhотойбди. Энээнэй хажуугаар Хойто зүгэй үсөөн тоото үндэһэн арадуудай ажабайдалай, байгаали хамгаалгын асуудалнууд болоно.
ФГБУ-гай «Главрыбвод» Байгалай таhагай даргын орлогшо Занна Вороновагай мэдээсэлээр омоли барилгын хорюул ба загаhанай түрьhэеэ хаяха болзорто хамгаалха ажал хэрэг хамта энэ загаhанай тоогой олошорхо хэрэгтэ hайн нүлөөтэй. Загаhанай тоо толгой олошоржо эхилээшье hаань, хорюулта болюулха асуудал табихань үшөө эртэ. Буряад Уласай Хүдөө ажахын яаманай түлөөлэгшэ Юрий Гиргушкин суглаанда хабаадагшадта загаhа үйлэдбэриин hалбарида тогтоhон байдал элирүүлжэ үгөө. Омолиин тоо олошоруулхын тула түрьhыень ургуулха хэрэгтэй гэжэ онсолон тэмдэглээ.
