Арадай Хуралай hунгамал Дмитрий Дружинин февралиин 25-да ээлжээтэ гүрэнэй дээдэ хуралай сесси дээрэ Байгал шадарай аймагта Сэлэнгэ мүрэн дээгүүр шэнэ хүүргэ барилгын хэрэгтэй байhан дээрэ анхарал хандуулба. Мүнөө сагта энэ мүрэн аймаг хоер хубида хубаана, харилсаан зундаа хаарбазаар, үбэлдөө мүльhэн дээгүүр бэелүүлэгдэнэ, харин бэшэ сагта ажаhуугшад олон тоото хүндэ ушарнуудтай тулалдана.
Орёо асуудалнууд hуралсалай, эмшэлгын ба ниитын туhа хүргэлгын гэхэ мэтэ асуудалнуудтай холбоотой. Харгын муудалгын сагай ута дээрэhээ боложо, гол гаталха аргын үгы сагта, паромой хүдэлхэ сагhаа боложо автобус ябахаа болидог. Татаурово тосхондо хаарбаза уhан замай үедэ үдэр бүхэндэ арбан саг соо 5 рейснүүдые бэелүүлдэг. Жэшээлхэдэ, нёдондо жэлдэ хаарбаза майн эхинhээ ноябрь hарын эхин болотор ажал ябуулаа, харин уhанай ехэ болоhон шалтагhаа удаан саг соо хүдэлөөгүй. Хүн зон голой нэгэ эрьеhээ нүгөө эрье Улаан-Yдэ хото тойрожо гү, али муу харгыгаар гарана, ииимэ харгы хүүргэ дээгүүр сэхэ гараhанhаа 5 дахин ута болоно.
- Сэлэнгэ мүрэнэй зүүн эрье дээрэ аймагай 11 мянган ажаhуугшадтай арбанай дүрбэн хүдөөгэй тосхонууд оршодог. Баруун эръеын зон харгын үгы сагта эмшэлгын, ниитын, хуули эрхын туhа абаха аргагүй болошодог. Зүүн эръедэ Татаурово тосхондо Байгалай аяншалгын ба сервисэй колледжын филиал бии, тэндэ 146 hурагшад hурадаг, тэдэнэй хахадынь баруун эръедэ ажаhуудаг. Харгын муудалгын үедэ колледж сэхэ ошохо аргагүй болодог, тиимэhээ дабаа дабажа хүрэдэг, -гэжэ тэрэ хөөрэбэ.
Yгэ хэлэгын үедэ hунгамал аяншалгын орёо асуудалуудые тэмдэглээ гэжэ парламентын мэдээсэлэй албан бэшэнэ:
- Байгал шадарай аймагай аяншалгын боломжо түргэн хүгжэнэ, харин Эрхүүгэй талаhаа «Байгал» гэжэ трассаар ерэhэн аяншалагшад Гремячинск, Түрхэл, Горячинск хүрэхын тула хаарбазада гарахаяа зунай сагта 2-3 саг соо ээлжээндэ зогсоно, үгы hаа Улаан-Yдэ хотоор тойроно.
Дружинин Буряад Уласай толгойлогшодо хандажа, hайн шанартай, шадалтай хүүргэ барилгын асуудал хараадаа абажа, ТЭО бэлэдхэжэ, мүнгэ оложо, энэ түсэл бэелүүүлхень гуйба.
