Буряад Уласай Арадай Хуралда Зүблөөн үнгэржэ, hунгамалнууд холбоото уласай «Оросой Холбоото уласай залуушуулай политикэ тухай» гэhэн хуулиин түсэл дэмжэбэ. Гүрэнэй Дээдэ Хуралhаа Федерациин Зүблөөнэй гэшүүн Александр Варфоломеев энэ хуулиин түсэл бэлдэлсэбэ. Энэ баримта бэшэг Гүрэнэй Дүүмэдэ июлиин 22-то дурадхагдаба.
Хуулиин түсэл зохёогшод залуушуулай политикын шухала ойлгосонуудые холбоото уласай хэмжээндэ тодорхойлхые, холбоото уласай, нютаг можын, нютагай хэмжээндэ хуулиин харилсаа тэнсүүлхые, гуримшуулхын үндэhэ hуури табихые дурадхана.
- Хуулиин түсэлдэ «залуушуул», «залуу бүлэ», залуушуулай политикэ» гэхэ мэтэ ойлгосонуудые холбоото уласай хэмжээндэ элирүүлхые дурадхагдана,- гэжэ Арадай Хуралай Нютаг можонууд хоорондын харилсаанай, үндэhэтэнэй асуудалнуудай, залуушуулай политикын, ниитын ба шажанай нэгдэлнүүдэй талаар хорооной түрүүлэгшын тушаалай уялга дүүргэгшэ Сергей Дорош дуулгаба.
Оросой Холбоото Уласта залуушуул тухай нэгэдхэмэл хуули үгы. Арадай Хуралай түрүүлэгшын уялга дүүргэгшэ Цырен-Даши Доржиев Буряад Уласта 1992 ондо декабриин 23–да залуушуулай политикэ тухай hайн хуули абтаhан гэжэ тэмдэглээ.
Холбоото уласай хуулиин түсэл зүбшэн хэлсэлгэ дээрэ Арадай Хуралай hунгамалнуудые залуушуулай наhа 14 - hөө 35 хүрэтэр ехэ болголго hонирхол татаа. Хуулиин түсэл зохёогшод залуушуулай наhа 35 хүрэтэр бодхооходо, олон залуу зон гүрэнэй тэдхэмжэдэ хүртэхэ аргатай болохо гэжэ баримтална.
