«Һуралсалай жэл халдабарита үбшэнэй үргэнөөр дэлгэрhэн хүндэ үедэ эхилжэ байна. Ехэ юумэн хэгдэнэ, тиигэбэшье, бүхы hургуулинууд хүсэд термометрнуудаар хангагдаадүй. Харин Болбосоролой ба эрдэм ухаанай яаманай мэдүүлhээр, хангагша сентябрь hарын түрүүшын долоон хоногой дүүрэтэр хүсэлдүүлжэ асарха ёhотой. Уласай hургуулиин хүтэлбэрилэгшэд, багшанар hуралсалай шэнэ жэлдэ бэлэдхэлэй ехэ ажал хэбэ. Шаналан хэлэхэдэ, пандеми дахин үргэнөөр дэлгэрнэ»,-гэжэ Буряад Уласай Арадай Хуралай спикер Владимир Павлов ээлжээтэ багшанарай августын суглаан дээрэ тэмдэглээ.
- Багшанарые ба hурагшадые короновирус үбшэнhөө аршалан хамгаалха ба hуралсалай шэнэ жэл хуушан байдалай түхэлөөр эхилхэ мүнөө сагта тон шухала. Һунгамалнуудай онсо хиналта доро нютаг засагай байгууламжануудай hурагшадые халуун эдеэгээр хангалга эмхидхэлгэ байна. Һайн шанартай, тэнсүүлэгдэhэн халуун эдеэгээр хангалга, нэн түрүүн, эхин hургуулиин ангинуудта, үхибүүдэй бэе элүүр байлгахын шухала хэрэг гээшэ, энээнэй хойшолонгынь - hуралсалай дүн hайжаруулга,- гэжэ уласай дээдэ хуралай түрүүлэгшэ хэлэбэ.
Арадай Хурал Россиин Гүрэнэй Дүүмын түрүүлэгшэдэ, Уласай Засагай газарай түрүүлэгшэдэ, Буряад Уласай сенаторнуудта, Гүрэнэй Дүүмын hунгамалнуудта hургуулиин эдеэ шанадаг газарнуудые техническэ хэрэгсэлнүүдээр хангалгын эрилтэ ондоо болгохыень хандалга эльгээhэн байна гэжэ hануулая.
Сентябриин 1-hээ эхин ангиин hурагшад халуун эдеэгээр хангагдаха.
