Арадай Хуралай бюджедэй, налогай ба мүнгэн hангай талаар хорооной hунгамалнууд 2020 оной бюджедэй хүсэлдэлгэ тухай хэлсэбэ. Хорооной түрүүлэгшэ Зоригто Цыбикмитовай тэмдэглэhээр, мүнөө уласай Дээдэ Хуралда мүнгэн hангай гол баримта бэшэгэй олзын ба гаргашалгын хуби дээрэ таhалгаряагүй ажал ябуулагдана. «Короновирусай пандемиин дүүрэхэдэ, саашадаа бидэ яажа ажамидархабибди гээшые ойлгохо ёhотойбди»,- гэжэ Цыбикмитов майн 26-да хорооной ээлжээтэ суглаан дээрэ онсолон тэмдэглээ.
Уридшалhан сэгнэлтээр, 2020 ондо нютагай бюджедтэ 7,5 миллион түхэригэй орохо олзо доошоо ороно. Урид дүн гаргалгаар уласай бюджедэй гүрэнэй татабариин ба татабариин бэшэ олзын доошололго – 5,9 млрд түхэриг, тэрэнэй тоодо олзын татабариин – 2,2 млрд түхэриг, НДФЛ-эй -1,2 млрд. түхэриг болоно. Эгээ муу хүгжэлтөөр орохо олзо 5,9 млрд. түхэригөөр доошоо унажа болохо,- гэжэ Зоригто Цыбикмитов тодорхойлбо. Дунда зэргын харуулhан тоогоор мүнөө сагай байдалаар орохо олзо 3,2 млрд түхэригөөр доошолоод байна, бюджедэй хүсэлдэлгэ даб дээрээ түсэбөөрөө.
- Ажал түсэбэй хэмжүүр соо ябана, таhалгаряагүй мүнгөө зүб тээшэнь тааруулха ажал ябуулагдаhанай hайгаар үлүү гаргашалга үгы. Жэшээлхэдэ, Буряад Уластамнай соёлой ба спортын хэмжээ ябуулганууд үнгэргэгдэнэгүй, тэдээниие үнгэргэхэдэ ошохо мүнгэн короновирустай тэмсээндэ hомологдоно. Тиигэбэшье, энэмнай пандемиин дүүрэхэ сагhаа дулдыдаха болоно. Yшөө hара болохо гү, али үбэл болотор дүүрэхэ гү, эндэ уридшалан хэлэхэнь хүндэ,- гэжэ Зорикто Цыбикмитов тэмдэглэбэ.
