Арадай Хуралай 11-дэхи ээлжээтэ хуралдаан дээрэ hунгамалнууд «Буряад Уласта хүүгэдэй зунай амарха болон элүүржүүлгын эрхэ хангалга» («Об обеспечении прав детей на отдых и оздоровление в Республике Бурятия») гэhэн Хуулида заhабари оруулаа. Элидхэгшэ - hунгамал Вячеслав Цыбиковай ойлгуулhаар, үхибүүдэй амаралтын асуудалаар зургаануудай хоорондын комисси байгуулха гэжэ дурадхагдана. Энэ тусхай эрхэтэй бүлэг соо гүйсэдхэхы засагай зургаануудай, хинан шалгалгын, нютагай өөрөө өөрыгөө хүтэлбэрилэлгын зургаануудай түлөөлэгшэд, үхибүүдэй эрхэ хамгаалагша, Арадай Хуралай hунгамалнууд орохо. Хуулиин түсэбөөр комиссиин эрхэ тодорхойлогдохо.
Элидхэгшын хэлэhээр, энэ жэлэй үхибүүдэй элүүржүүлгын кампанида уласай бюджедтэ 260 миллион түхэриг хараалагданхай. Харин короновирус халдабарита үбшэнhөө боложо, зунай амаралта мэдэгдээгүй байдалда. Зүбшэн хэлсэлгын үедэ Хуралай гэшүүд хүндэ байдалда байhан бүлэнүүдэй үхибүүдтэ hара бүхэндэ тараан үгэхэ эдеэ хоолой согсолборидо мүнгэ hомолхо гэжэ дурадхал оруулаа.
Энэ асуудал Социальна политикын талаар хорооной ажалай зүблэлдэхэ суглаан дээрэ үргэлжэлөө.
Yхибүүдэй зунай амаралтын байдал тухай Спортын ба залуушуулай талаар яаманай сайд Вячеслав Дамдинцурунов хөөрэбэ. Тэрэнэй хэлэhээр, энэ жэлдэ 45 мянган үхибүүдые элүүржүүлхэ гэжэ түсэблэгдэhэн байгаа, тэдээн соо 13 мянганhаа олониинь хүндэ ажамидаралай байдалда байна. Мүнөө сагта элүүржүүлгын кампанида бэлдэлгэ тогтоогдонхой. Зунай сагта үхибүүдэй сагаа үнгэргэхэ элдэб янзын арганууд хараалагдана.
