Мартын 5-да Буряад Уласай Арадай Хуралай ээлжээтэ сесси дээрэ үхибүү үргэжэ абаһан бүлэнүүдтэ туhаламжа хүргэхэ тухай асуудал хараада абтаба. Энэ хуулиин проект дэбжүүлдэг Буряад Уласай Социальна хамгаалгын яаманай сайд Татьяна Быковагай тэмдэглэhээр, энэ проектоор 10 наhанhаа 18 наhа хүрэтэр үхибүү үргэжэ абаһан бүлэнүүдтэ 10 мянган түхэригэй түлбэриин хэрэг үргэлжэлүүлхэ гэжэ дурадхагдана.
Гэртэхингүй, гээртэхинэй харууhагүй үлэһэн үншэн үхибүүд тухай мэдээсэл нютаг можын бэшэгдэдэг баримтада оруулагдаха ёhотой. Энэ тогтоhон хэмжээ ябуулгын дүн шэнжэлэлгын ба сэгнэлтын зорилготойгоор 2018 оной январиин 1- hээ 2019 оной декабриин 31 болотор байгуулагдаhан.
- Шэнжэлэлгэ энэ тэдхэмжын хэмжээ ябуулга hайн үрэ дүнтэй байhанииень харуулаа,- гэжэ сайд дуулгана. -Энэ хуулиин бэелүүлэгдэхэ үедэ гэртэхинэй харууһагүй 10-18 наhатай хүүгэдэй тоо доошолоо, 156 бүлэнүүд 220 үхибүүдые хүмүүжүүлгэдэ абаа, - гэжэ Татьяна Быкова тэмдэглээ. 2017 ба 2018 онуудтай зэргэсүүлхэдэ, энэ хэмжээ ябуулга гэртэхинэй харууhагүй үхибүүдэй тоо доошолуулаа. Тиигэбэшье, үшөө 10 наhанhаа дээшэ 227 үхибүүд нютаг можын бэшэгдэдэг баримтада оруулагданхай.
Татьяна Быковагай тэмдэглэhээр, үхибүүдые үргэмэл бүлэдэ хүмүүжүүлхэ гээшэ - үншэн хүүгэдэй ажабайдал түхеэрэлгын нэгэ ехэ һайн ерээдүйтэй арга болоно. Энээнэй хажуугаар, бүлэдэ хүмүүжүүлгэ гүрэнэй газарта хараһанһаа гаргашань хоёр дахин бага болоно.
