Республикын гүрэнэй дээдын хуралда «Театрнуудай ажал ябуулга» гэhэн «дүхэриг шэрээ» үнгэрбэ. Энэ арга хэмжээнэй эмхидхэгшэ - Нютаг можонуудай хоорондын харилсаанай, үндэһэтэнэй асуудалнуудай, залуушуулай политикын, ниитын ба шажанай нэгэдэлнүүдэй талаар хороон. Энэ ажал ябуулгада арадай hунгамалнууд, Буряад Уласай Засагай газарай гэшүүд, соёлой хүдэлмэрилэгшэд эдэбхитэй хабаадаа.
Соёлой яаманай сайд Соёлма Дагаева Буряад орондо 5 республикын театрнууд ба 35 арадай театрнууд хүдэлнэ гэжэ дуулгаба. «Бүхы дэлхэй дээрэ театрнуудай ажал ябуулга хододоо экономическа талаар гарзатай байдаг. Тиимэhээ, республикын бюджетhээ 500 миллион түхэриг гүрэнэй тогтоогдоhон даалгабари дүүргэлгэдэ hомологдоно. Энэнэй ехэнхинь хадаа хүдэлмэрилэгшэдэй салинда, байшангуудай заhалгада ошоно. Багахан лэ мүнгэн гастрольнуудта, шэнэ спектакль, табилгануудта гаргагдана»,- гэжэ Дагаева хэлэбэ.
Республикын хүүхэлдэйн «Үльгэр» гэжэ театрай директор Баярма Дашидоржиева театрай искусство болон нютаг засагай болбосоролой эмхи зургаануудта соёл дэлгэрүүлдэг эмхи зургаануудай бэшэжэ тоолоhон данса байгуулха хэрэгтэй гэжэ тодорхой дурадхал оруулба. Буряад Уласай Засагай газарай грант 3 миллион түхэригhөө 6 миллион түхэриг хүрэтэр, уран зохёолой ба урлалай талаар шагналнуудые 100 мянганhаа 200 мянган түхэриг болотор дээшэлүүлхэ гэhэн дурадхалнууд оробо.
- Бидэ танай орёо асуудалнуудые ойлгобобди. Дурадхалнуудыетнай зууршалгын проектдо оруулжа, сашадаа бэелүүлхэбди, - гэжэ Арадай Хуралай Хорооной түрүүлэгшэ Валерий Доржиев тэмдэглээ.
