Буряад Уласай Толгойлогшо Алексей Цыденовта буряад хүнэй нэгэ үдэрэй байра байдал харуулба. Багахан экскурси Хяагтын аймагай Энхэ-Тала нютагта үнгэрбэ. Буряад арадай байра байдал, соел болбосорол харуулһан энэ музей ТОСой хүсөөр соелой байшан соо шэнэлэгдээ.
«Найдал» ТОСой эдэбхитэд энэ жэлдэ экспонадуудые суглуулжа эхилhэнээ хөөрэбэ. Нютагай зон гуйлтыень дэмжэжэ, эдэбхитэйгээр эд бараагаараа хубаалдаа. Мүнөө энэ «эдэбхитэй» үнэн байдал харуулhан музей соо эхэнэрнүүдэй нооhо ээрэхые, эрэшүүлэй мяха бэлдэхые, багахан хүүгэдэй буряад арадай наада шагай наадахые хаража болоно.
«Ургажа ябаhан үхибүүдые музей соогоо буряад эдеэгээ яагаад зүбөөр бэлдэхэб, эдихэб, аха зондо хайшан гэжэ хандахыень харуулнабди, заанабди. Музей соо урданай буряад арадай хубсаhан, хониной арhан, морин хуур, мүнгөөр шэмэглэhэн эмээл табигданхай» - гэжэ музейн даагша хөөрэбэ.
Уласай толгойлогшодо буряад зоной байра байдал, урданай заншал харуулаа, мяхан хундэ табижа хүндэлөө.
Энхэ – Талын хүдөөгэй соелой байшан 1932 ондо баригдаhан, анханай хүүгэдэй сэсэрлигэй байшан соо байрлана, тиигээд нёдондо шэнэлэгдэжэ заhабарилагдаа гэжэ тэмдэглэе. Энэ байшанда «Найдал» ТОСой уласай мүрысөөндэ шүүhэн 150 мянган түхэриг оруулагдаа, үшөө тиихэдэ 1,2 сая түхэриг олониитын инфраструктурын мүнгэнhөө ороо.
