Арадай Хуралай һунгамал Леонтий Красовский Мухор –Шэбэрэй аймагта «Амарлин» дасан хүрэһэн байна. Ушар юуб гэхэдэ, тэрэ дасанай шэрээтэ Баясхалан лама хүүгэдтэ бэеын тамир олгуулха, ажал хэрэгтэ һургаха хүсэлһөө кунг-фу зааха һанаатай.
Нютагай зон дасанаа «буряад шаолинь» гээд нэрлэдэгшье болонхой. Харин һорилгонууд үргэлжэ үнгэргэгдэжэ байдаг бэшэ, гансал зунай дулаан хаһада тэрэ ябуулагдана. Депутадай тэмдэглэһээр, ямаршье сагта дэмбэрэлтэ энэ хэрэг ябуулжа байхын тулада байра байдал зохëохо шухала. Теэд хэн тэрэниие хангахаб гэһэн асуудал харюу үгы үлэнхэй.
Депутатдай хамта дасанай байра байдалтай танилсахаяа барилгадань туһа хүргэһэн зон ябалсаба. Тэрэ тоодо, аймагай толгойлогшо, нютагай шулуу нүүрһэнэй уурхайн ветеранууд, Оросой үнэн алдарта сүмын түлөөлэгшэд, нютаг нугануудай хүтэлбэрилэгшэд, олзо эрхилэгшэд болон бусад.
Улас нютагтаа эгээн түрүүшын болохо дайшалхы урлигай дасан Түгнын голой дайдада, Баян хаан үндэрэй хормойдо 2018 ондо нээгдээ һэн гээд эндэ һануулая. Дасанай дэргэдэ тамирай һургуулишье нээгдэхэ гээд анхан соносхоотой бэлэй. Гол түлэб у-шу тулалдаан заагдаха гээд хэлэгдэһэн байгаа. Юрэнхыдөө, Дундада Хитадай Шаолинь хиидэй дээдэ шатын санаартан буужа эрьежэ байхаар түсэблэгдэнхэй.
