Ородой Холбоото Уласай Засагай газарай түрүүлэгшын орлогшо – Юрэнхылэгшын Алас Дурнын тойрогтохи бүрин эрхэтэй түлөөлэгшэ Юрий Трутнев болон Буряад Уласай толгойлогшо Алексей Цыденов хоëр ажалаа зүбшэхэ гэжэ һая уулзаба. Тэндэ гол түлэб Ородой Холбооной юрэнхылэгшын майн зарлигаар хараалагдаһан асуудалнуудые шиидхэхэ тухай хөөрэлдөөн болоо. Ноябриин 27-до Владивосток хотодо үнгэрһэн суглаан дээрэ хэлсэгдэһээр үнөөхи асуудалаар юун хэгдээб гэжэ Буряад ороной толгойлогшо соносхобо.
Юрэнхылэгшын зарлиг хүсэлдүүлхэ талаар юутэйбибди, юун үшөө хэрэгтэйб гэжэ декабрь соо тодоор тоосохобди. Гүрэн түрын Эдэй засаг хүгжөөлгын яамантай хамта Буряад орониие дэмжэхэ арга боломжонуудые гүрэнэй дээдын зургаануудта дурадхаха түсэбтэйбди. Тиигээдшье, Алас Дурна зүгэй тойрогто хабаатай болоһон тула гүрэнэй талаһаа дэмжэгдэхээр хараалагдаһан хэмжээнүүдые булты дууһан хэрэглэхэ хүсэл бии. Арга нүхэсэлнүүд энэ талаар тодорхойлогдожо эхилэнхэй, - гээд Буряадай толгойлогшо тоособо.
Юрий Трутнев юрэнхылэгшын майн зарлиг бэелүүлхэ уялга тухай дабтан тэмдэглэхэ зуураа:
Алас Дурна зүгэй орон можонуудые хүгжөөхэ аргануудай гараад байхада, тон лэ зохид дурадхалнуудаа түргэн дары оруулха ëһотойбди. Энээниие алдажа огто болохогүй. Тиимэһээ энэ дороо ажалаа эхилхыетнай гуйнаб. Тиигэбэлнай юрэнхылэгшын зарлин заатагүй бэелүүлэгдэмээр байна. Энэмнай юрэ саарһан бэшэ, тэрэнэй саана орон уласай, улад зоной байра байдал хараалаатай бшуу. Энэ жэлһээ эхилжэ, мүн 2019-2021 онуудай туршада хүгжэлтын хубилалтанууд лаб туйлагдаха. Энэ ажалаа түргэдүүлхэ шухала, - гээд Трутнев ажалай уулзалгын үедэ онсо тэмдэглээ.
Тэрэнһээ гадна, Буряад уласта гүрэнэй дэмжэлгын хэмжээнүүд дүүрэн хүртэхэл байха гээд найдамтайгаа мэдүүлээ. Мүнөөдэр Юрий Трутнев засаг зургаануудай болоод ниитын түлөөлэгшэдтэй уулзажа, Алас Дурнын байдал хүгжөөхэ саашани хараа түсэбүүд тушаа хэлсэхэ байха.
