Пенсидээ гараха наһандаа дүтэлһэн зондо элдэб хүнгэлэлтэнүүдыень хуушан зандань үлөөхэ тухай дурадхал Арадай Хуралда ороһон байна.
Мүнөө шэнэ ëһоор, наһанайнгаа амаралтада гараха болзорой хойшолуулагдахада, 55 болон 60 наһандаа хүрэхэдэ үгтэдэг хүнгэлэлтэнүүд ба тэдхэмжэнүүд тэрэл зандаа үлэхэ ëһотой гээд Ородой Холбоото Уласай юрэнхылэгшэ Владимир Путин августын 29-дэ хандалга дотороо соносоо бэлэй. Тиимэһээ гүрэн түрэдэ нэбтэрүүлэгдэжэ байһан пенсидэ хабаатай хубилалтануудай боложо байха үедэ Буряад Уласай хуули ëһонуудта тудаһан байдалда тааруу хубилалтанууд мүн лэ оруулагдаха жэшээтэй. Энэл ушарһаа тус үүсхэл һабагшатай.
Мүнөө эрхэ байдалда гэр байрын түлөө түлбэриин, Баунтын аймагта түмэр замай болон агаарай тээбэринүүдтэ хабаатай, мүн тиихэдэ ажаһудалай, элүүрын хамгаалгын хангалтануудай хүнгэлэлтэнүүд Буряад орондо пенсиин наһаяа хүсэһэн наһажаал зондо хууляар хараалаатай гээд тэмдэглэе.
Гэхын хажуугаар 2005 оной мартын 24-эй № 1047-III дугаарта «Буряад Уласай дэбисхэр дээрэ хүдөө нютагуудта, ажалай тосхонгуудта (хотын шанарай тосхонгуудта) ажаһууһан, ажаллаһан мэргэжэлтэдтэ ажаһуудалай талаар үгтэһэн дэмжэлгын хэмжээ гурим байгуулха тухай» хуулида хубилалтануудые оруулха шухала гээд дурадхагдана. Юуб гэхэдэ, элүүрые хамгаалгын ажалда 25-һаа доошо бэшэ хугасаа соо эмшэлгын һалбарида хүдэлһэн, мүн 10-һаа доошо бэшэ хугасаа соо хүдөө нютагта байрлан хүдэлһэн, гадна 25-һаа доошо бэшэ хугасаа соо багшын ажал мүн лэ хүдөө нютагта ябуулһан, зүгөөр мүнөө тэндээ ажаһууһажа байһан наһатай зондо гэр-байрын түлөө түлбэридэнь хүнгэлэлтэнүүд хараалаатай бэлэй. Эгээл тэрээнииень тэрэл зандань үлөөхэ гэжэ эндэ хэлэгдэнэ бшуу.
Туд хуули ëһын түсэл Арадай Хуралай ээлжээтэ хуралдаан дээрэ зүбшэн хэлсэгдэхэ юм ха.
