Тус хуралдаанда аяар 150 гаран хүн хабаадаа гээд Восток-Телеинформ дуулгаба. Хэлсэгдэһэн гол асуудалнуудай дунда аймаг хотонуудай захиргаануудтай, бусадшье засаг захиргаануудтай хамтын ажал эмхидхэхэ арга боломжонууд зүбшэгдөө. Тиигээдшье, ТОСуудай арга шадалнууд тухай хөөрэлдөөн болоо. Хабаадагшадай һонорто Арадай Хуралай депутадууд хуули ëһонуудтай холбоотой орëо асуудалнууд тухай дэлгэрэнгыгээр ойлгуулжа үгэһэн байна. Тиигэжэ, хэмжээ ябуулгада депутадууд Михаил Гергенов, Сергей Дроздов, Батор Цыбиков болоод Игорь Марковец гэгшэд хабаадалсаһан байна.
Игорь Марковец ТОСуудай амжалтатай жэшээ болгон, өөрын тойрогой эдэбхитэд тухай хөөрөө. Тэндэнь ажаһуугшад хамтаржа, хүүгэдэй талмай зохëожо баряа ха.
Буряад уласта ТОСууд хэдэн жэлэй саана бүридхэгдэжэ захалаа һэн. Тэрэ үедэ арга шадалыньшье ахирхан һааб даа. Эдэбхитэдые хүн тоожош үгэдэггүй һэн. Харин нëдондонһоо хойшо байдал эрид хубилаа. Буряад Уласай толгойлогшо Алексей Цыденов хаа хаагуур дууһан шахуу ябажа, ТОСуудтай ехэ ажал хээ. Нëдондо ТОСуудай хүдэлөөндэ зорюулагдаһан хуули ëһонуудш зохëогдон абтаа. Яһала горитой мүнгэ танганшье энэ хэрэгтэ һомологдоо, - гээд Игорь Марковец тэмдэглэбэ.
Буряад Уласта ТОСуудай өөрын хүтэлбэриие гүрэнэй талаһаа дэмжэхэ тухай хуули Арадай Хуралай 29 дүгээр хуралдаан дээрэ апрелиин 24-дэ хоëрдохи уншалгаар абтаа һэн гээд һануулая. Эдэбхи үүсхэлые Буряадай толгойлогшо Алексей Цыденов эрхилээ бэлэй. 2017 оной хабар Улаан-Үдэдэ үнгэргэгдэһэн аймаг нютагуудай хуралдаан дээрэ тэрэ ТОСуудай улам үндэр шатада гараһые тэмдэглээ һэн. «ТОСуудай ажабайдалые саазын хэргэмдэ хүргэхэ саг ерээ. Бэрхэшээл гээ һаа, энэ сагта тэдэ гансал грантнуудай ашаар ажамидаржа байна. Хуулита эрхэтэй болоходонь мүнгэ алтааршье ходо хангажа байха эрхэ байдал тогтохо бэлэй», - гээд тиихэдэ тэрэ хэлээ һэн.
