Арадай Хуралай һунгамал Виктор Аюшеев улас түрын засагай газарай захиргаанай тушаалда саг зуурын болзороор томилогдобо. Тэрэ Баир Жамбаловай орондо, үгы байха сагтань, Буряад Уласай толгойлогшын болон засагай газарай захиргаанай хүтэлбэрилэгшын дэбисхэр хүгжөөлгын талаар орлогшын, мүн дэбисхэр хүгжөөлгын хорооной түрүүлэгшын тушаал эзэлээ, гээд Восток-Телеинформ дуулгана.
Буряадай толгойлогшо Алексей Цыденовай гар табилгатай энээн тухай зарлиг Буряад Уласай толгойлогшын болон засагай газарай сайт дээрэ толилогдонхой.
Баир Жамбалов мүнөө сагта Хориин, Хэжэнгын, Загарайн аймагуудые багтаадаг нэгэ мандаадтай һунгуулиин 28 дугаар тойрогоор Арадай Хуралда депутадаар дэмжүүлэгдэхэнь гээд тэмдэглэе.
Тобшолол: Баир Владимирович Жамбалов Буряад уласай Хориин аймагай Тэгдэ нютагта түрэһэн намтартай. «Хүдөө ажахын үйлэдбэриин эдэй түрын эмхидхэгшэ» гэжэ түрүүшэ мэргэжэлтэй. Ажалайнгаа зам Хориин аймагай «Хүрбын» совхоздо шэлэһэн мэргэжэлээрээ захалаа. 2000 ондо тэндээ түрүүлэгшэ болоо, 2002 ондо Арадай Хуралай гурбадахи зарлалай депутадаар һунгагдаһан байна.
2003 ондо 37 наһандаа Жамбалов Хориин аймагайнгаа толгойлогшоор томилогдоо, удаань, 2008 ондо тэндээ дахин тушаалдаа һунгагдаа. Тэрэл жэлдээ ВСГУТУ – гэй «менеджиент» гэһэн мэргэжэлээр магистратура дүүргэбэ. 2012 ондо уласай толгойлогшо Вячеслав Наговицын тэрэниие захиргаанайнгаа дэбисхэр хүгжөөлгын хорооной түрүүлэгшээр томилоо һэн.
