Александр Поповай хэлэһээр, энэ һалбарида хаа хаагуур ехэ анхарал хандуулагдадаг болонхой. «Хүдөө ажахын академиин хүдэлмэрилэгшэд, биишье өөрөө Италиин агро-аяншалгын фермэнүүдые эрьежэ, ажалаа яажа эмхихээ ха гэжэ хаража ерээбди. Таатай зохид аргануудые оложо, эндээшье тиимэ ажал нэбтэрүүлмээр байна», - гээд тэрэ тэмдэглэнэ.
Буряадай гүрэнэй хүдөө ажахын академи Арадай Хуралтай хамта Европын Холбооной уласхоорондын түсэл бэелүүлгэдэ эдэбхитэйгээр хабаадалсана. Тэндэ Германиин, Польшын, Чехиин болон Ородой Холбооной хүдөө ажахын дээдэ һургуулинууд оруулагданхай. Тэрэ түсэлэй ëһоор, хүдөөгэй нютаг нугануудые хүгжөөхэ арга боломжонууд шүүмжэлэгдэн үзэгдэнэ. Илангаяа, арюун һайхан эдеэ хоол буйлуулха онол аргануудта анхарал хандуулагдана.
Мүнөө сагта Буряад орондо бага зэргын ажахынууд 66 % эдеэ гаргана. Тэрэнь булта һайн шанартай, бэе махабадта хорогүй. Агро-аяншалга болоод ариг сэбэр үйлэдбэрилгэ хоëр бэе бэеэ дууряаха ëһотой. Эгээл энэ талаар ажал Буряад орондо ябуулбал таатай байна. Илангаяа, Гүрэнэй Дүүмын эдеэшэг органик бодосто хүдөө ажахы тухай хуули абахада энэ һалбари одоол һалбарха. Буряад уласташье тиимэ хуули ëһо абтаха гээд найданаб, - гэжэ Попов тэмдэглээ.
Тэрэнэй хэлэһээр, ажахын хажуугаар хүдөө нютагуудта агнууриин, загаһа барилгын, амтатай эдеэ буйлуулан туршаха талаар аяншалга хүгжөөхэдэ таатай. Харин аяншалгын талаһаа ажал мүртэй ябуулагданагүй. Тиимэһээ улас түрэ дотороо хүдөө ажахын дэргэдэ оюутадта зорюулагдаһан һуралсалай тусхай хүтэлбэр зохëохо түсэб бэелүүлэгдэжэ эхилэнхэй. Агро-аяншалгын мэргэжэлэй магистратурашье нээгдэбэ.
