Иимэ дурадхалтайгаар улас түрын толгойлогшо Алексей Цыденов Мартын 8-най һайндэртэ зорюулагдаһан концерт наадан дээрэ олондо хандаһан байна гээд Восток-Телеинформ Засагай Газарай дуулгаһые дууряан мэдээсэнэ.
- Буряад уласнай бүхы рекорднуудые үргэлжэ сохижо байна. Нёдондо «Байгал» театрнай хатарай тон орёо урилдаанда эрхимлээ һэн, манай Worldskills команда Краснодарта болоһон ехэ урилдаанда түрүү һуури эзэлээ һэн. Манай тамиршад Оросой болоод уласхоорондые хэмжээнэй тэмсээ мүрысөөнүүдтэ дүн хамта 600 медаль шүүгөө, бидэ «Стартапуудай ниислэл» гэжэ зиндаада хүрэжэ шадаабди. Манай басаган «Оросой дангина» гэжэ түрүүшынхиеэ болоо. Рекорднууд манай хойноһоо даханхай. Саашадаашье тэдэниие сохижо ябуужамди. Тиигээд, арба хоноод баһал манай һайндэр – Юрэнхылэгшын Үдэр, - гээд уласай толгойлогшо хэлэһэн байгаа.
Гүрэн түрын юрэнхылэгшын һунгалтада һунгагшадай тоогоор баһа рекорд табия. «Рекорднуудые сохиё», - гээд Цыденов уряалба.
Ородой Холбоото Уласай Юрэнхылэгшын һунгалта хойто амаралтын үдэр, мартын 18-да үнгэрхэнь гээд һануулая. Дээдын энэ тушаалай түлөө найман хүн тэмсэхэнь - Сергей Бабурин, Павел Грудинин, Владимир Жириновский, Владимир Путин, Ксения Собчак, Максим Сурайкин, Борис Титов и Григорий Явлинский гэгшэд мүн.
Буряад Уласта юрэнхылэгшын һунгалта Интернедтэ дамжуулагдажа байха. Тиигэжэ, һунгуулиин бүхы газарнуудта видеокамеранууд тодхоогдохо.
Һунгагша бүхэн, ямарш һунгуулиин газарта ороод, һунгалта хэр үнгэржэ байнаб гэжэ хараха аргатай байха, - гээд хотын һунгуулиие хорооной түрүүлэгшэ Марина Андронова анха түрүүн тэмдэглээ һэн.
