Буряад Уласай Толгойлогшо Вячеслав Наговицын улас түрэ дотор үльгэр домогто Алан Гоо хатанда хүшөө бодхоохо тухай үүсхэл дэмжэбэ. Энэ хэрэгээр байгуулагдаһан тусхай комисси хүшөөгэй дүрсэ хэбүүдэй мүрысөө үнгэргэжэ, эрхимыень «Алтаргана» нааданай үедэ тодоруулха юм ха.
Түнхэндэ Алан Гоо хатанай хүшөө бодхоё гэһэн эдэбхи үүсхэл Түнхэнэй аймагай һунгамалнуудай зүблэлэй түрүүлэгшэ Аламжа Сыренов оруулһан байна. Тэрэ бүхы һунгамалнуудай нэрэһээ Буряад Уласай толгойлогшодо бэшэг эльгээхэдээ «аймаг доторнай уласхоорондын хэмжээнэй шүтөөн газарнууд олон, монгол туургата зон тэдэ газарнуудта һүгэдэн мүргэдэг гээшэ» гээд тэмдэглэнэ.
«Тэрэ тоодо – үльгэр домогто Алан Гоо хатан заатагүй ороно. Тэрэ Агуу Шэнгэс хаанай уг унди болохо Борджигин омогтоной үзүүр үндэһэн, юрэдөө, хамаг монгол, хальмаг, буряад изагууртанай Эхэ хатан мүн. Хори арадай Эсэгэ Хоридой – мэргэнэй басаган байһан гээд үльгэртэ түүрээгдэдэг. Эртэ урда сагта хори-түмэдэй байрлаһан Хүбсэгэл Байгалай дундахи дайдада тэрэ мүндэлһэн гэхэ. Энэ дайда дэбисхэр оршондо Түнхэнэйшье аймаг оролсоно», - гээд бэшэг дотор хэлэгдэнэ.
Буряадайнгаа нэрэ хүндые улам дээшэнь үргэхэ хэрэгтэ, үргэл мүргэлэй, арад зонтой юрэ танилсалгын аяншалга хүгжөөлгэдэ, имагтал Орос-Монголой хоорондохи харилсаа бэхижүүлгэдэ, бүгэдэ буряадай уласхоорондын «Алтаргана» ехэ нааданда удха ульһа оруулха һэдэлгэ ябуулгада лаб туһатай байха энэ үүсхэл дэмжыт гэжэ Сыренов хандаһан байна.
Улас түрын толгойлогшо Вячеслав Наговицын эдэбхи үүсхэлыень дэмжэжэ, хүшөөгэй хэб дүрын мүрысөө эмхидхэхые баадхаба. Урилдаанай дүнгүүд «Алтарганын» эсэстэ соносхогдохоор хараалагдана. «Алтаргана» ехэ наадан 7 һарын 1-һээ 3 болотор үнгэрхэ гээд энда һануулая.
