Халхын голдо болоһон байлдаануудта хабаадагша Цэрэнгийн Чимэдцэрэн «Алтаргана-2026» гэһэн уласхоорондын 16-дахи буряад соёлой нааданда ерэбэ. Июлиин 1-дэ, Буряадай толгойлогшо Алексей Цыденов өөрөө Монголой 102 наһатай ветераные Ц.С. Сампиловай нэрэмжэтэ уран зурагай музейдэ угтан абаба.
"Алтаргана гээшэмнай нэгэдүүлгын һайндэр, буряад арадай баяр ёһолол, анханай буряадуудай газар дайда дээрэ хоёр жэлэй нэгэ удаа үнгэрдэг. Буряад орондо, Үбэр Байгалай хизаарта, Эрхүү можодо, Монгол орондо. Бүхы айлшадые баяртайгаар угтан абанабди. Мүнѳѳдэр маанадта иимэ хүндэтэ айлшан – хэдэн дахин айлшалһан Чимэдцэрэн хүгшэн эжы ерээ." Тэрэ 102 наһатай, иимэ хүндэтэй наһандаа ехэ эршэтэй, хүсэтэй», - гэжэ Цыденов тэмдэглэбэ.
Цэрэнгийн Чимэдцэрэн монгол талаһаа тэрэ үйлэ хэрэгүүдэй һүүлшын амиды гэршэ мүн. 1939 ондо 15-тайхан басаган байхадаа, һайн дураараа фронтдо мордожо, санитаркаар ажаллажа, монгол, совет сэрэгшэдэй ами наһа абарһан байна. Арадуудай хоорондохи нүхэсэл бэхижүүлгэдэ габьяатай хубитаяа оруулһанайнгаа түлөө 2025 ондо Монголой гүрэнэй дээдэ шагнал – Сүхбаатарай орденоор шагнагдаа.
Буряадай соёлой сайд Соелма Дагаева Чимэдцэрэнэй баатаршалга «Халхын гол. Тангариг» гэһэн зүжэгэй үндэһэн боложо, Ородой Холбоото Уласай «Алтан баг» театрай шагналда хүртэһэн байна гэжэ мэдээсэбэ.
