Улаан-Үдэ хотодохи Үбэр Байгалай арадуудай угсаата зүйн музейн амитадай буланда байдаг амитадай нэрэнүүд буряадшалагдаа. Восток-Телеинформгэһэн мэдээсэлэй агентствын сурбалжалагшада музейн захиргаанай дуулгаһаар, энэ ажал «Үндэһэн хэлэнүүдые ба угсаата соёлой шэглэлтэй бусад зүйл шудалалгые дэмжэхэ талаар Улас түрын «Бэлиг» түб» гэһэн гүрэнэй бюджедэй эмхи зургаанай Гүрэнэй оршуулгын албантай суг хамта бэелүүлэгдээ.
Улаан-Үдэ хотын захада оршодог тус музей нарата Буряад ороной танюуһата тэмдэг гэжэ тоологдодог юм. Эндэ хуннануудай, буряадуудай, эвенкнүүдэй, һоёдуудай, Үбэр Байгалай хасагуудай, шэмээшэгүүдэй анханай һуудал байдал үргэнөөр харуулагданхай. Музей ерэгшэд үргэн тала дайдада ажаһуудаг арадуудай ёһо заншалтай танилсаха аргатай.
Музейдэ гаршагай самбарнуудай, стенднүүдэй бэшэлгэнүүдые болон бусад мэдээсэл буряад хэлэндэ оршуулха ажал нёдондо бэелүүлэгдэжэ эхилээ юм. Оросой эгээл томо музейнүүдэй нэгэн болодог энэ музейн захиргаан гаршагай самбарнуудаа гурбан хэлэн дээрэ – ород, буряад ба англи дээрэ бүтээхэ гэжэ шиидээд, Улас түрын «Бэлиг» түбтэ хандаа һэн. Даб дээрээ амитадай нэрэнүүдһээ гадна хотын хэсэгэй гэрнүүдэй нэрэнүүдтэй болон тобшо мэдээнүүдтэй хабтаһанууд оршуулагданхай. Харин мүнөө буряад хэсэгэй оршуулга хэгдэжэ байна. Тиин музей һайшаалай сэгнэлтэдэ хүртэжэ эхилэнхэй гэжэ тэмдэглэлтэй.
- Нёдондо Татарстанһаа айлшад аяншалжа ерэһэн аад, буряад оршуулгануудаар ехэ һонирхоо. Буряад ба татаар хэлэнүүд дээрэ зарим юумэнүүдэй нэрэнүүд адли байна гэжэ мэдэхэдээ, ехэ зохидшоогоо, - гэжэ музейн хүдэлмэрилэгшэд тэмдэглээ.
Музей оршуулха талаар ажалаа үргэлжэлүүлхэ хүсэлтэй. «Энэ хадаа ехэ шухала ажал гээшэ болон буряад хэлэнэй дүүрэн хүсэндөө үүргэеэ дүүргэхынь тула хэлэнэй оршон байгуулха хэрэгтэ хубитаяа оруулна», - гэжэ музейдэ онсолоо.
