Арадай Хуралай депутат Оксана Бухольцева ээлжээтэ сесси дээрэ «Байгал» театртаа мүнгөөр туһалая гэжэ дурадхал оруулба. «Арадай Хуралай, мүн уласай Толгойлогшын нөөсэ жасаһаа гаргашалхада болохо, - гээд тэрэ тэмдэглэхэ юм. – «Байгал» театр Ородой Холбооной, бусадшье дээдын хэмжээндэ суурханхай.
Театрнай ямарш хүндэ сагта, өөрын байшаншье үгы һаа аргагүй гоë номернуудые харуулжа шадана, - гээд Бухольцева онсолхо зуураа – удаадахи хуралдаандаа хүндэлэлгын ëһолол үнгэргэжэ, урмашуулха арга бэдэрэе. Гаргашань ехэ, тиимэһээ нэгэ – хоëр сая бэшэ, горитойхон бэлэг хараалая, гээд бодомжолбо.
Һунгамалнууд хэлэгшыень ехэтэ дэмжэбэ. Тиигэжэ, Бато Семенов энэ асуудалые унжагайруулангүй, хойто намарай сесси болгожо байнгүй мүнөөдэртөө шиидхэел гээд уряалаа.
Улас түрынгээ нэрэ хүндые холо саагуур үргэжэ байхадань, гүрэн түрын теле-түсэлдэ амжалтатай хабаадана, бидэ бэеэ абаад һууха эрхэгүйбди – гээд тэрэ тэмдэглэнэ.
