Буряад Уласай Арадай Хуралай түрүүлэгшын уялгануудые дүүргэгшэ Владимир Павлов хүдөө аймагуудай һургуулинуудта дамжуулагдаха автобусуудай түлхюурнүүдые барюулгын баяр ёһололдо хабаадаба. Энээн тушаа улас түрын парламентын хэблэлэй албан мэдээсэнэ.
Энэ унаанууд манай орондо федеральна «Һургуулиин автобус» гэжэ программын ашаар дамжуулагдаһан байна. «ПАЗ 32053-70» түхэлэй һургуулинуудта таруулагдаһан 10 автобус абаха хэрэгтэ гүрэн түрын һанһаа 16 сая 150 мянган түхэриг һомологдоһон байгаа.
Хүсэһэндөө хүрөөбди гэжэ һанаагаа амарха ёһогүйбди. Һургуулинуудтамнай автобусууд үшөө хэрэгтэй. Зарим тээ автобусуудынь хуушараа. Энэмнай хүүгэдэй аюулгүй байдалда, тэдэнэй түрэлхидэй һанаанай тэгшэ байхада сэхэ хамаатай, - гээд Владимир Павлов онсолон тэмдэглээ.
