Улаан-Үдэ хотын «Ая-Ганга» гэһэн хүүгэдэй сэсэрлиг буряад хэлэ хүгжөөхэ талаар Буряад Уласай Толгойлогшын «Үндэһэн хэлэнэй үлзы хэшэг» гэһэн шан абаа. Тус хүүгэдэй сэсэрлиг даагша Светлана Цыренжаповагай Восток-Телеинформгэһэн мэдээсэлэй агентствын сурбалжалагшада хэлэһээр, иимэ ехэ удха шанартай илалта хадаа хүүгэдэй сэсэрлигэй бүхы ажалшадай габьяа гээшэ.
Хүүгэдэй сэсэрлиг һургуулиин урдахи бага наһанай үхибүүдые буряад хэлэнэй оршондо оруулдаг программа бэелүүлдэг юм. Светлана Цыренжаповагай хөөрэһөөр, сэсэрлигтэ 10 бүлэг тоологдодог. Тэдэнэйнь 2-ынь сэсэрлигэй богоһо алхажа ороһоор лэ, бүхэли үдэртөө ганса буряад хэлэлгэ шагнадаг. Харилсаан, һуралсал, мүн бүхы һайндэрнүүд буряад хэлэн дээрэ эмхидхэгдэдэг.
- Эдэ багашуулда хүүгэдэй сэсэрлиг хадаа буряад хэлэнэй оршондо хүгжэхэ, хүмүүжүүлэгдэхэ газар гээшэ, - гэжэ Светлана Цыренжапова тэмдэглээ.–Гэртэнь ондоо хэлэнэй оршон байгаа ёһотой. Юуб гэхэдэ, ехэнхинь хотын хүүгэд юм. Тиимэһээ таахада, гэртээ буряадаар хөөрэлдэдэггүй.
Энэ түсэлэй хүтэлбэрилэгшэ хадаа БГУ-гай хүүгэдые һурган хүмүүжүүлгын, сэдьхэл шэнжэлэлгын эрдэмэй тэнхим даагша Сономбал Содномов болоно. Улаан-Үдэ хотодо мүнөө иимэ шэглэлэй хоёр сэсэрлиг бии. «Ая-Гангаһаа» гадна «Номина» гэһэн сэсэрлиг буряад хэлэнэй оршондо оруулдаг юм.
- Иимэ арга үрэ дүнтэйгөө гэршэлээ, - гэжэ Светлана Цыренжапова тоолоно.–Түрэл хэлэеэ шудалхадаа, үхибүүд Эхэ орондоо дуратай, үнэн сэхэ, бэе бэедээ тэсэмгэй болодог ха юм. Мүн анхарал, хадуусань хүгжэдэг. Теэдшье минии һанамжаар, үхибүүд заабол түрэл хэлэеэ мэдэхэ ёһотой. Тэдэниие тон багаһаань буряад хэлэндэ һургаха, түрэл хэлээрээ ходо харилсажа, шагнажа байхынь тула хэлэнэй оршон тогтоохо шухала.
«Ая-Ганга» гэһэн хүүгэдэй сэсэрлиг 100 мянган түхэригэй шанда хүртөө. Энэ мүнгөө сэсэрлигэйнгээ эд хэрэгсэлэй-оньһоной үндэһэ һуури хүгжөөлгэдэ болон буряад хэлэ сахин хүгжөөхэ ажалаа үргэлжэлүүлгэдэ шэглүүлхэ түсэбтэй.
