Буряадай гүрэнэй ехэ һургуулиин Зүүн зүгэй институдай Буряад хэлэн ба уран зохёолой дээдэ һургуулида аймагуудай һургуулинуудтай бэелүүлдэг ажал тухай хөөрэжэ үгөө.Дээдэ һургуулиин захирал Гарма-Ханда Гунжитовагай Восток-Телеинформгэһэн мэдээсэлэй агентствын сурбалжалагшада хэлэһээр, ажалай гол шэглэлнүүдэй нэгэн хадаа бүлэг аймагууд руу ошолго болоно.
- Бидэ аймагуудаар эдэбхитэйгээр ябадагбди. Хорон хамшагай үедэ энэ жэл түрүүшынхиеэ олоороо ошохоор түсэблөө һэмди. Иимэ гурбан хэмжээ ябуулга хараалагдаһан байгаа. Жэшээнь, зүблөөгөө Хоридо үнгэргэхэдэмнай, Яруунын ба Хэжэнгын багшанар тиишээ баһа ошодог.Хурамхаангарахадаа, Баргажанай аймагай багшанарые баһа суглуулдагбди. Теэд һүүлэй үйлэ хэрэгүүдһээ боложо, энэ ажалаа даб дээрээ апрель болотор хойшолуулаабди. Аймагуудаар ябахадаа, мэргэжэл дээшэлүүлгын семинарнуудые үнгэргэдэгбди. Улаан-Үдын багшанар мантай ябалсадаг. Тиин шэнэ онол арга, бүтээлнүүд, арга зүй гэхэ мэтэтэй танилсуулдагбди. Жэшээнь, мүнөө шэнэ ФГОС-уудые нэбтэрүүлһэн байдалда буряад хэлэ заалгын асуудал шухала болонхой, - гэжэ Гунжитова тэмдэглээ.
Илангаяа аймагуудта багшанаршье, нютагай захиргаануудшье иимэ ажал дэмжэдэг, хэрэгтэй гэжэ тэмдэглэдэг. Мэргэжэлээ дээшэлүүлхэдэньшье туһатай ха юм.
- Аймагууд руу ошохо болоходоо, Улас түрын «Бэлиг» түбэй түлөөлэгшэдые урихаяа оролдодогбди. Тэдэ шэнэ номуудайнгаа үзэсхэлэн дэлгэдэг. Уластамнай мүнөө гансал энэ түб буряад хэлэн дээрэ һуралсалай номуудые бэлдэн гаргаха эрхэтэй юм гэжэ һануулая. Тиимэһээ буряад хэлэн дээрэ хүүгэдэй бүхы шахуу номууд тэндэ нара харадаг, - гэжэ Гарма-Ханда Гунжитова хэлээ.
