Буряад хэлэнэй оршондо оруулдаг программануудые илангаяа буряадуудай олоор ажаһуудаг хүдөө аймагуудай хүүгэдэй сэсэрлигүүдтэ эдэбхитэйгээр нэбтэрүүлхэ хэрэгтэй гэжэ Буряадай гүрэнэй ехэ һургуулиин Зүүн зүгэй институдай Буряад хэлэн ба уран зохёолой дээдэ һургуулиин захирал Гарма-Ханда Гунжитова тоолоно.
- Хүүгэдэй сэсэрлигые бүхэли үдэрэй туршада бүхы ажаябуулгаяа гансал буряад хэлэн дээрэ бэелүүлдэг оршондо оруулха шухала, - гэжэ тэрэ хэлээ. –Үхибүүдэй ганса буряад хэлэлгэ соносохын тула бүхы хүмүүжүүлэгшэд ба һургамаршад буряадаар дуугарха ёһотой.Туршалгын гуримда иимэ арга Улаан-Үдын 52-дохи хүүгэдэй сэсэрлигтэ БРИОП-ой түлөөлэгшэ Соном Цыденович Содномовой ударидалга доро бэелүүлэгдэдэг. Тиин олон ондоо яһанай үхибүүдэй ябадаг сэсэрлигтэ, үшөө Улаан-Үдэдэ тус туршалгын ашаг үрэ эли харагдана. Үнгэрхэдөө ондоо яһанай үхибүүн сэсэрлигтэ ганса буряад хэлэнэй оршондо байхадаа, гэртээ буряадаар дуугаржа эхилнэ. Иимэ ушарнууд үсөөн бэшэ.
Бүхыдөө ажал саашадаа энэ шэглэлээр ябуулагдаха жэшээтэй: хүүгэд бага наһандаа ямаршье хэлэндэ һайнаар һурадаг.
Уласта буряад хэлэ сахин хүгжөөлгэ Буряадай Болбосоролой болон эрдэм ухаанай яаманай зохёон бэлдэһэн «Буряад хэлэ сахин хүгжөөлгэ» гэһэн программын хэмжээндэ бэелүүлэгдэдэг юм гэжэ тэмдэглэхэ шухала. Гүйсэдхэгшэдэйнь нэгэн хадаа тус яаманай Улас түрын «Бэлиг» түбэй бүридэлдэ байгуулһан Буряад хэлэ хүгжөөхэ талаар Улас түрын түб болоно. Гадна тус шэглэлээр БГУ, БРИОП баһа хүдэлдэг юм.
- Энэмнай хамтын ажал, - гэжэГунжитова онсолоо.–Манай оюутад дипломно хүдэлмэринүүдые бэшэдэг, хүүгэдэй сэсэрлигүүдтэ дадалга гарадаг. Жэшээнь, мүнөө жэл манай оюутан «Хүхэ трактор» гэһэн мүльтфильмын ашаар яагаад буряад хэлэндэ һургахаар бэ гэжэ шэнжэлээ. Тэрэ түгэсхэлэйнгөө хүдэлмэри соо һуралсалай хэрэгсэлэй түсэб зохёогоо. Бидэ буряад хэлэ дэлгэрүүлхэ хэрэгтэ оюутадаа эдэбхитэйгээр хабаадуулхаяа, шэнэ арга зүйнүүдые хэрэглүүлхэеэ оролдодогбди.
