Буряад хэлэнэй заагдадаг ямаршье нютаг можын һургуулинуудта хэрэглэгдэжэ болохо буряад хэлэ шудалалгын ажалай программа Буряад Уласта зохёогдоо. Гол түлэб Агын ба Усть-Ордын тойрогууд тухай хэлэгдэнэ.
Энэ ажалда Буряад Уласай Болбосоролой болон эрдэм ухаанай яаманай захилаар зохёогшодой бүлэг хабаадаа. БГУ-гай Зүүн зүгэй институдай Буряад хэлэн ба уран зохёолой дээдэ һургуулиин захирал Гарма-Ханда Гунжитовагай Восток-Телеинформгэһэн мэдээсэлэй агентствын сурбалжалагшада хөөрэһөөр, Буряад Уласай, Үбэр Байгалай хизаарай болон Эрхүү можын болбосоролой яамануудай хоорондо хэдэн жэлэй саана суг ажаллаха тухай хэлсээн баталагдаһан юм. Тиин Буряадта хэблэгдэһэн һуралсалай номууд заншалта ёһоор гурбан нютаг можодо хэрэглэгдэдэг байгаа. Гэхэтэй хамта, уласта зарим шэнэ УМК-нууд гүрэнэй буряад хэлэ шудалхын тула зохёогдоод, имагтал нютагтаа хэрэглэгдэхээр хараалагдаһан юм. Юуб гэхэдэ, гансал Буряад орон гүрэнэй хоёр хэлэтэй ха юм: буряад ба ород.
- Теэд удхаараашье, бүридэлөөрөөшье эдэ УМК-нууд Агада, Усть-Ордада буряад хэлэ заалгада таараха, - гэжэ Гунжитова тэмдэглээ. –Тиимэһээ шэнэлэгдэһэн ФГОС-ой үндэһөөр бидэ буряад хэлээр ажалай программануудые зохёон бэлдэжэ, түрэлхишье, гүрэнэйшье буряад хэлэ шудалдаг газарта хэрэглэгдэжэ болохо гэжэ тодорхойлон бэшээбди. Гүрэнэй буряад хэлэн гэжэ улас дотор хэрэглэгдэхэ, харин түрэлхи хэлэн гэжэ - буряад хэлэнэй заагдадаг ямаршье һургуулида.
Ажалай программын түлэб холбоото уласай хэмжээндэ баталагдаха ёһотой, удаань программануудай холбоото уласай тобьёгто оруулагдаха болоно. Буряадта УМК-нууд шэнэ ФГОС-уудай ёһоор шэнэлэгдээд, октябриин эхеэр Юрэнхы болбосоролой талаар нютаг можын һуралсалай-онол аргын нэгэдэлэй (РУМО) зүбшөөлдэ хүртөө гэжэ тэмдэглэлтэй.
