Буряад орондо Буряад хэлэнэй габшагай һарын хэмжээндэ бэлигтэй уран шүлэгшэ Цырендулма Дондогойн түрэһөөр 90 жэлэй ойдо зорюулагдаһан зохёолгонуудай мүрысөөн үнгэргэгдэхэ. Хэмжээ ябуулгые Буряадай гүрэнэй ехэ һургуули эмхидхэнэ.
Цырендулма Цыреновна Дондогой 1932 оной декабриин 21-дэ Яруунын аймагай Нарһата һууринда түрэһэн намтартай. Багшанарай училищи дүүргээд, ажалайнгаа зам Хурамхаанай аймагай Аргада һууринда багшаар эхилһэн юм. Удаань Доржо Банзаровай нэрэмжэтэ Буряадай гүрэнэй багшанарай дээдэ һургуули түгэсхөөд, 5 жэлэй туршада Яруунын аймагай Иисэнгэ, Эгэтын-Адаг һууринуудай һургуулинуудта багшалаа. Һүүлдэ «Буряад үнэн» сониной сурбалжалагшаар хүдэлөө, Монгол туургата арадуудай хүүгэдэй уран зохёолшодой уласхоорондын эблэлэй нарин бэшэгэй даргаар ажаллаа. Цырендулма Цыреновна оршуулгашье хэдэг байһан. Үшөө оюутан ябахадаа, С.Михалковой «Дядя Стёпа» гэжэ бүтээл буряадшалжа, оршуулгануудайнгаа түрүүшын ном хэблүүлээ. Гадна Пушкинай «Домик вКоломне» поэмэ, Шекспирэй «Гамлет» гэһэн трагеди, Лонгфеллын «Песнь оГайавате» гэжэ поэмэ, Лермонтовэй, Ахматовагай, Нерудын шүлэгүүдые, Маршагай поэмэнүүдэй ба онтохонуудай суглуулбари оршуулһан габьяатай.
Цырендулма Цыреновнагай түрүүшын ном 1962 ондо нара хараһан юм. Мэдээжэ уран шүлэгшэбуряад уран зохёолой хүгжэлтэдэ горитой хубита оруулһан, ехэ нүлөө үзүүлһэн арба гаран согсолбориин зохёогшо гэжэ һануулая.
Гадна БГУ-гай Зүүн зүгэй институдай Дээдэ һургуулида Восток-Телеинформ гэһэн мэдээсэлэй агентствын сурбалжалагшада хөөрэһөөр, Цырендулма Цыреновнада зорюулагдаһан үшөө нэгэ мүрысөөн бии. Энэмнай хадаа «Буряад шүлэгөө уншая» гэһэн челлендж мүрысөөн болоно. Тус мүрысөөн нёдондошье үнгэргэгдөө һэн. Мүнөө жэл хабаадагшад уран шүлэгшын шүлэгүүдые уншаха.
