Августын 23-да Улаан-Үдэ хотодо Буряадай Үндэһэтэнэй номой санда «Арга» гэһэн наадантай танилсуулга эмхидхэгдээ. Сугларһан зон наадантай танилсахаһаа гадна наадажа туршаа юм.
Шэрээн энэ наада Юрэнхылэгшын грантнуудай жасын мүнгэнэй ашаар «Этнопланета» гэһэн соёлой түб зохёогоо гэжэ Новая Бурятия бэшэнэ. Зохёогшод Жасын мүрысөөндэ абаһаар лэ илажа гараа гэжэ тэмдэглэхэ шухала. Юуб гэхэдэ, түрүүшын туршалгаһаа шүүхэ гээшэ хомор юм. Ехэнхидээ хүнүүд хоёрдохиёо, гурбадахияа, мүн үшөөшье хабаадаад, грантда хүртэжэ шададаггүй. Энэ хадаа «Арга» гэһэн түсэлэй тэрэ тоодо холбоото уласай хэмжээндэ бүхы эрилтэнүүдтэ харюусаһыень гэршэлнэ. Һуралсалай шэнэ жэлэй эхиндэ тус наадые буряад, англи хэлэнүүдэй багшанарта, түрэл хэлэеэ дэбжүүлдэг ниитын ажал ябуулагшадта түлбэригүйгөөр дамжуулхаар хараалагдана. Зүгөөр танилсуулгын хэмжээ ябуулгада ерэһэн хүнүүд энэ наадые һайшаажа, олон зондо хүртэхынь тула наймаанда табихые дурадхаа.
Нааданай эхилхэһээ урид Улаан-Үдэ хотын 33-дахи гимназиин буряад хэлэнэй багша Эржэна Доржиева һурагшадтай, оюутадтай, мүн томошуултайшье тус нааданай туһаар буряад соёлтой танилсуулха мастер-класс үнгэргөө. Наада зохёогшод – хэлэ бэшэгэй эрдэмэй дид-доктор Эржэна Доржиева, түүхын эрдэмэй дид-доктор Дарима Санжиева, социологиин эрдэмэй доктор Сембрика Иванова гэгшэд тус наадан түрэл хэлэ шудалалгада туһатай байха гэжэ бата этигэнэ. Сембрика Ивановагай онсолһоор, бага балшар наһанһаа түрэл хэлэндэнь һургаха шухала. Тиимэһээ энэ наадан хүүгэдтэеэ сүлөө сагаа үнгэргэхэ тон һайн арга боложо үгэхэ.
- «Арга» нааданай дүримүүд ехэ бэлэн, «бродилка» гэһэн нааданайхидал адли. Нааданай талмай «байра» гэжэ нэрлэгдэдэг 6 хубида хубаагданхай. Наадагшад эхинһээ эсэс болотор тэдэниие гаталха ёһотой. Тиихэдээ тэдэ «Гэр, бүлэ», «Ой, байгаали», «Сурхарбаан», «Байгал», «Сагаалган», «Табан хушуу мал» гэһэн сэдэбүүдээр үгэнүүдые һанаха, мүн оньһон үгэнүүдые оршуулха, буряад таабаринуудые тааха болоно. «Арга» наадан буряад арадай һайндэрнүүдэй удхаар зохёогдонхой һэн тула хүүгэдтэ элдэб янзын сэдэбүүдээр гол үгэнүүдые түргөөр, бэлэхэнээр хадуужа абаха арга олгоно, - гэжэ Эржэна Доржиева хөөрөө.
Улаан-Үдэ хотын Октябриин хороогой «Дайнай үхибүүд» гэһэн ниитын эмхиин түрүүлэгшэ Роза Болотовагай һанамжаар, буряад хэлэ хүгжөөхэ гээшэ мүнөө сагта тон шухала зорилго. «Наһатай зон, хүгшэн аба эжынэр хүүгэднай түрэл хэлэеэ хэзээдэшье бү мартаг лэ даа гэжэ хүсэдэг. Юундэб гэхэдэ, түрэл хэлэн гээшэ тон ехэ баялиг ха юм», - гэжэ тэрэ тэмдэглээ.
