«Эрхим багша»фильм үшөө нэгэ ажалаар нэмэбэ. Энэ удаа кинолента Хори аймагай Жанаевай нэрэмжэтэ 1 дүгээр Хориин дунда һургуулиин буряад хэлэнэй багша тухай хөөрэнэ.
Лариса Дамбаевна – буряад хэлэнэй багша, дээдэ мэргэжэлэй багша, “Эрхим багша-2021” багшын дүй дүршэлэй уласхоорондын урилдаанай III шатын лауреадай нэрэ зэргэдэ хүртэһэн. Лариса Дамбаевна болбол өөрөө Хори аймагай Амгаланта һууринай, буряад хэлэнэй болон уран зохёолой багшаар 2006 онһоо ажаллана. Лариса Дамбаевнагай хүтэлбэри доро һургуулидань “Алтан булаг” гэһэн кружок хүдэлнэ, тэрэ түрэлхи хэлэндээ һонирхол түрүүлхэ зорилгоор байгуулагдаһан юм. Энэ кружогто 5-9 ангиин һурагшад ябажа, түрэл арадайнгаа соёл, ёһо заншал, удха зохёолтой болон түрэл хизаар оронойнгоо арадай аман зохёолтой танилсадаг.
Лариса Дамбаевнагай хэлэһэнэй ёһоор, гадаада хэлэнэй багша болохо гэһэн аад, түрэлхи хэлэнэйнгээ факультедтэ орожо, буряад хэлэнэй багша болоо. Иимэ шиидхэбэри абахадань һургуулиин багшань болон тэрэнэй эхэнь ехэ нүлөө үгөө, эхэнь шэмээшэгэй һууринда үндыһэн байха юм, тиимэһээ буряадаар дуугаржа шадахагүй байгаа, харин басагамни хэлээ мэдэг гэжэ ехэ мүрөөдэһэн байгаа.
- Минии зорилго болбол хүүгэдтэ байһан һонирхолыень унтараангүй байха юм, - гэжэ Лариса Дамбаевна хөөрэнэ. Эндэһээ боложо олон һанаа бодол түрэдэг, тэрэ тоодо мүнөөнэй технологи ашаглалга юм. Мүнөө хүүгэд һураха дуратай, олон гаджедүүд болон һураха номууд бии, энэнь ехэ һайшаалтай.
Хориин СОШ-то буряад хэлээ үзэлгэдэ долоон хоногто хоёр саг үгтэдэг, тиимэһээ минута бүхэн һонирхойлтой байха шаардалгатай. Тиин, технологиин багша багшын гуйлтаар абдар дархалжа үгөө, тэрэнэй һайгаар тэрэ наада үнгэргэдэг, хүүгэдтэ энээн соо юун байнаб гэжэ таахыень дурадхадаг, энэ хуу буряад хэлээр хэлэхэ юм ааб даа.
- Намда элдэб ангинууд бии, нэгэл сэдэбээ онло ондоогоор үгэдэгби, - гэжэ багша хэлэнэ. Тэрэ тодорхой ангиһаа болон тодорхой хүүгэдһээ дулдыдадаг. Тиимэ арга зүйгөөр хэшээлэй сэдэб ашагтайгаар болон дүрсэлжэ ойлгогдохо болодог, - гэжэ багша хэлэнэ.
Лариса Дамбаевна Ванжилова тухай кино хараха гэбэл иимэ холбоосоор үзэжэ болоно https://youtu.be/VHqKyq6PiyY.
