Буряад Уласта буряад хэлэнэй болон уран зохёолой эрхим танхимай уласай урилдаанай илагшад болон шангай һуурида хүртэгшэд шагнагдаа. Энэ урилдаан “2021-2030 онуудта Буряад Уласта буряад хэлэ хамгаалга болон хүгжөөлгэ” гэһэн гүрэнэй хүтэлбэри бэелүүлхэ хүреэндэ үнгэргэгдөө. Илагшад “Юрэнхы болбосоролой буряад хэлэнэй болон уран зохёолой эрхим танхим” ба “Сэсэрлигэй болбосоролой эмхинүүдэй буряад хэлэнэй эрхим танхим”гэһэн хоёр номинацида шүүгшэд илагшадые сэгнээ гэжэ Восток-Телеинформ
бэшэнэ.
Һургуулинуудай хоорондо Улаан-Үдэ хотын 29 дүгээр гимназиин багша нэгэдэхи һуури эзэлээ, хоёрдохидо – Ахын СОШ-ой багша, гурбадахи һуурида – Сэлэнгын аймагай багша эзэлээ. Сэсэрлигэй болбосоролой эмхинүүдэй хоорондо Аршаанай хүүгэдэй сэсэрлиг нэгэдэхи һуури эзэлээ, хоёрдохи һуури – Улаан-Үдэ хотын 35 дугаар хүүгэдэй сэсэрлигэй багша ба гурбадахида – Ивалгын аймагай “Хараасгай” гэһэн хүүгэдэй сэсэрлигэй багша эзэлээ.
Мэргэжэлтэ шүүгшэдэй хэлэһэнэй ёһоор, энэ урилдаанай бэлэдхэлэй хэмжээн, техникын талаар тоногжуулга, интерактивна самбарнуудтай, компьютернуудтай, проекторнуудтай болон мүнөө сагай гэрэй бараа табилгатай байлга, мүн баһа арга зүйн болон уран һайханай уран зохёолой, сахим һураха номуудтай байлга болон хэлэ, уран зохёол болон соёл үзэхын тула тааруу зохид оршон байгуулһан тухай Буряад Уласай сайдай орлогшо - юрэнхы болон нэмэлтэ болбосоролой хорооной түрүүлэгшэ Батор Цыренжапов хөөрэнэ.
- Эрхим танхимуудые шэлэжэ гаргаха гээшэнь яһала орёо байгаа, юундэб гэхэдэ эдэнэр булта муниципальна шатануудай илагшад болоно ха юм. Тиимэһээ шангай һуурида хүртэгшэд гээшэ хадаа –эрхимүүдэй эрхимүүд болоно. Бүхы ажалнууд шанар һайтай байгаа. Орёонь юун байгааб гэхэдэ, эндэ удха шанараараа нэгэ адли ажалнууд байгаа юм, - гэжэ шүүгшэдэй гэшүүн Оксана Дареева хэлэнэ. – Би өөрынгөө туршалгаар мэдэнэб, эдэ багшанар ехэ бэрхэ ба ехэ ажаллана, зарим нэгэн энэ ажалда 30 гаран жэл хүдэлнэ. Хэдэн үдэр шүүгшэд һуужа ажалнуудые сэгнээ, дахин лэ эрьежэ хараха баатай болообди, тиигэжэ бултые зэргэсүүлһэнэй удаа энэ тэрэ эрилтэнүүд хэнэйхиниинь һайн байгааб гэжэ элирүүлһэн байнабди.
Урилдаанда хэдэн эрилтэнүүд табигдаа, тэдэнэй нэгэниинь болбол һургалтын, эрдэм ухаанай-арга зүйн болон уран һайханай уран зохёолоор хангалга, багшын болон тэрэнэй һурагшадай абаһан шагналнуудай болон грамотануудай тоо, мүн баһа багшанарай хэшээлэй бэлдэсэнүүд, түсэбүүд, түһөө түсэлнүүд, ажалай дэбтэрнүүд, һонирхолтой шэнэ зүйлнүүд болон тэрэнһээ гадуур танхимай шэмэглэл болоно.
“29 дүгээр Буряадай гимнази” гэһэн МАОУ-гай буряад хэлэнэй танхимай даагша Лхама Цыренова иигэжэ тэмдэглээ, тэдэнэй ажалда гол шухалань болбол буряадай ёһо заншал дамжуулга мүн, тиихэдэ хүүгэд өөрын түрэлхи хэлээр сүлөөтэй хөөрэлдэжэ шадаха аргатай байлга. “Манай һургуулида дуугардаг, ойлгодог элдэб үхибүүд бии. Уласта манай танхим түрүү һуури эзэлһэндэнь би ехэ бяартай байнаб. Бусад багшанарта болон һургуулинуудта зохёохы ажалдань амжалта болон шэнэ нээлтэнүүдые хүсэнэб”, - гэжэ тэрэ хэлээ.
