Улаан-Үдэ хотын һурагшад «Юун? Хаана? Хэзээ?» гэһэн оюун ухаанай нааданда хабаадаба. Энэ онлайн-наадан Эрдэмэй болон оньһон арга зүйн жэлдэ зорюулагдан, октябрь һарада үнгэргэгдөө юм. Хэмжээ ябуулга Буряад хэлэнэй габшагай һарын хэмжээндэ 29-дэхи Буряад гимназида хоёрдохи жэлээ эмхидхэгдээ гэжэ Восток-Телеинформ мэдээсэнэ.
Буряад хэлэн «2021 - 2030 онуудта буряад хэлэ сахин хүгжөөлгэ» гэһэн улас түрын программын хэмжээндэ дэмжэгдэдэг ба дэлгэрүүлэгдэдэг юм. Программые Буряад Уласай Болбосоролой болон эрдэм ухаанай яаман залан хүтэлдэг, гүйсэдхэгшэдэй нэгэн – яаманай Буряад хэлэ хүгжөөхэ талаар улас түрын түб. Буряад Уласай Болбосоролой болон эрдэм ухаанай яаман хадаа заншалта болоһон онлайн-нааданай эмхидхэн байгуулагшадай ба эмхидхэгшэдэй нэгэн юм гэжэ онсолхо шухала.
Хэмжээ ябуулгада 16 һургуулиин түлөөлэгшэд хабаадаа. Тэдэ бага, дунда ба аха бүлэгүүдтэ хубааран мүрысөө. Бага бүлэгтэ 1-дэхи һуури 54-дэхи һургуули эзэлээ, 2-дохи һуури – 108-дахи һургуули, 3-дахи һуури – 29-дэхи Буряад гимнази. Дунда бүлэгтэ 43-дахи һургуули илалта туйлаа, шангай һууринуудые 50-дахи ба 35-дахи һургуулинууд эзэлээ. Аха бүлэгтэ 47-дохи һургуули эрхимлээ, 2-дохи һуури 54-дэхи һургуули абаа, харин 3-дахи һуури 32-дохи һургуули болон 29-дэхи Буряад гимнази хубаагаа.
«Юун? Хаана? Хэзээ?» нааданай гол зорилго хадаа буряад хэлэ шудалха таатай эрхэ байдал тогтоолго, буряад соёл хүгжөөлгэ, хүүгэдэй ба залуушуулай хүдэлөө дэмжэлгэ, зохёохы бэлигтэй, мэдэсэ ехэтэй үхибүүдые элирүүлгэ ба урмашуулга, хүүгэдэй нэгэдэлнүүдэй ажалай дүй дүршэл дэлгэрүүлгэ, буряад соёлой үнэтэ зүйл удхалан ойлголгодо шэглүүлэгдэһэн хүүгэдэй ажал ябуулга эмхидхэлгэ болоно.
