Улаан-Yдэ хотодо буряад хэлэнэй габшагай һара үргэлжэлһөөр. Эмхи зургаан бүхэн эдэбхитэйгээр өөрынгөө хэмжээ ябуулгануудые үнгэргэнэ: зурагай болон фото зурагуудай, шүлэг уншалгын мүрысөөнүүд, үзэсхэлэнгүүд, уран уншалганууд, буряад хэлэндэ зорюулагдаһан хэшээлнүүд, караоке, флеш-мобнууд, элдэб янзын нааданууд, ухаан бодолой урилдаанууд, интерактивна талмайнууд, зүжэг табилганууд гэхэ мэтэ.
Хотын һургуулинуудта (онлайн аргаар) хотын хэмжээнэй ябуулганууд үнгэрнэ. Улаан-Yдэ хотын 355 жэлэй ойн баярта зорюулагдаһан «Дуулан магтанаб түрэл хотоёо!» гэжэ уран уншалгын мүрысөөн эхилбэ. Видео-бэшэлгэнүүдэй абалга октябриин 18-һаа 20 болотор ябуулагдаха. Хабаадагшад видео-бэшэлгэеэ namsaraeva.el@mail.ru гэжэ сахим хаягаар эльгээхэ ёһотой болоно. Буряад Уласай уран шүлэгшэдэй оршуулагдаһан бүтээлнүүдые уншахада болохо. Мүрысөөнэй дүнгүүд октябриин 28-даа гараха.
Октябриин 20-да 2 – 4 -дэхи ангиин, 5 - 8-дахи ангиин, 9 - 11-дэхи ангиин һурагшадай бабагшанар болон гэртэхинэй дунда Оюун ухаанай «Юун? Хаана? Хэзээ?» гэжэ онлайн-наадан үнгэрхэ. Хабаадалгын мэдүүлгэ 29-дэхи Буряад гимназиин bg-school@yandex.ru гэһэн сахим хаягаар октябриин 18 болотор эльгээжэ болохо.
Октябриин 21-дэ буряад хэлээр МПЦ-гэй нээмэл суглаан түсэблэгдэнхэй. Суглаанай темэ «Улаан-Yдэ хотын болбосоролой эмхинүүдтэ «Буряад хэлэн» ба «Буряад литература» заалгын орёо асуудалнууд ба холын хараа».
Октябриин 27-до онлайн аргаар Улаан- Yдэ хотын 1 – 4 -дэхи ангиин һурагшадай дунда «Дүрбэн тэгшэ» гэһэн буряад хэлээр олимпиада үнгэрхэ. Энэ хэмжээ ябуулгада «В контакте» гэжэ сүлжээ холбоондо Буряад хэлэ хүгжөөлгын талаар «Хүгжэлтэ» гэжэ Улас түрын түбэй хуудаһан дээрэ https://vk.com/club191341875 ссылкээр орожо хабаадаха.
Түрүүшын «Хоорнуудай тулалдаан» гэһэн багшанарай бүлэгүүдэй дунда нютаг можын мүрысөөн онлайн аргаар үнгэрхэ. Коллектив бүхэн нэгэ дуу буряад хэлэн дээрэ гүйсэдхэхэ. Хабаадалгын мэдүүлгэ октябриин 18 болотор абтаха, видео-бэшэгүүдые октябриин 24 болотор namsaraeva.el@mail.ru сахим хаягаар эльгээхэ. Дүнгүүд октябриин 28-да гаргагдаха.
Энэ габшагай һара Хотын буряад хэлэнэй багшанарай фестиваляар Хотын хүүгэдэй урлалай байшан соо түгэсэхэ, - гэжэ Восток-Телеинформ Буряад Уласай Болбосоролой болон эрдэм ухаанай яаманһаа дуулгана.
«2021-2030 онуудта буряад хэлэ хамгаалга ба хүгжөөлгэ» гэһэн хүтэлбэриин хүреэндэ Буряад Уласта буряад хэлэ дэмжэхэ талаар ажал ябуулагдана гэжэ хэлэхэ хэрэгтэй. Тус хүтэлбэриие Буряад Уласай Болбосоролой болон эрдэм ухаанай яаман бэлдэжэ, 2020 оной декабрь соо баталһан байгаа. Буряад Уласай Болбосоролой болон эрдэм ухаанай яаманай Буряад хэлэ хүгжөөхэ уласай түб болбол хүтэлбэри бэелүүлэгшэдэй нэгэн болодог юм.
