Һургуулиин багшанар хэшээлнүүд дээрээ видеоролигуудые буряад хэлэн дээрэ харуулдаг болохо.Энэ арга хэлэ шудалхада ехэл туhа болохо. Эдэ ролигуудые «Номто» гэhэн республикын турнирай бэлдэгшэд байгша ондо бэлэн болгоhон байна. Энэ ролигууд сэсэрлигэй хүүгэдтэ ехэл тааруу. Энэ формат дээрэ бүтээгдэhэн буряад хэлэндэ hургалгын ажал бүхы сэсэрлигүүдээр тараагдаhан байна. Эдэ видеоролигуудые хүүгэд гэртээ анхаралтайгаар харахадаа, hонирхол татажа, дахин дахин харадаг болоо. Тиимэhээ олон үгэнүүдые, тэдэнэй удхыень мэдэхэ болоо.
Жэшээлхэдэ, «Нааданхайнууд» гэhэн ролик үхибүүдтэ ехэл тааруу, илангаяа тэдэнэй наhанда. Видеоролик харахадаа, үхибүүд хадуужа абахаhаа гадна, нюдөөрөө харана, үзэнэ, хэды дахин шагнана.
«Минии бүлэ» гэhэн ролик баhал тааруу. Энэ ролик хараад, хүүгэд эжы, аба тухайгаа юумэ мэдэдэг болоно.Үхибүүд олон үгэнүүдтэй танилсана, харин тэдэнэй грамматическа талаhаань хэлэниинь хурса, ухаан бодолынь түргэн болоно гэжэ тэмдэглэхээр. Энэ темэ үзэхэдээ, хүүгэдэй лексикэ баян болоно. Тус темэеэ хэды дахин дабтахадаа, тобшолол хэхэдээ, бүри hайнаар ойлгохо, хадуужа абаха.
«Минии бэе» гэhэн ролик харахадаа, үхибүүд баhал олон юумэ мэдэжэ, хүнэй бэеын хуби тухай ойлгодог, илгаруулдаг болохо хожом.
«Хубсаhан» гэhэн видеоролик харахадаа, элдэб үнгэнүүдтэй танилсаха аргатай болоно.
«Номто» гэhэн буряад хэлэнэй республиканска турнир мүнөө жэлэй хабар үнгэрhэн байна. Энэ турнирта республикын 15 аймагай сэсэрлигэй хүүгэд хабаадаа. Тэдэнэй тоодо Улаан-Үдын гурбан аймаг болон Усть-Ордагай табан аймагууд хабаадалсаа.
«2021-2030 онуудта буряад хэлэ хамгаалга ба хүгжөөлгэ» гэһэн хүтэлбэриин хүреэндэ Буряад Уласта буряад хэлэ дэмжэхэ талаар ажал ябуулагдана гэжэ хэлэхэ хэрэгтэй. Тус хүтэлбэриие Буряад Уласай Болбосоролой болон эрдэм ухаанай яаман бэлдэжэ, 2020 оной декабрь соо баталһан байгаа. Буряад Уласай Болбосоролой болон эрдэм ухаанай яаманай Буряад хэлэ хүгжөөхэ уласай түб болбол хүтэлбэри бэелүүлэгшэдэй нэгэн болодог юм.
