Буряадай толгойлогшын 2021 оной январиин 1-hээ багшанарай салин нэмэлгын шиидхэбэри тухай Буряад Уласай Арадай Хуралай социальна политикын талаар хорооной түрүүлэгшэ Игорь Марковец hанамжаяа хэлэбэ. Дээдэ Хуралай гэшүүн энэ шиидхэбэри мүнөө короновирус үбшэнтэй тэмсэлгын сагта ехэ бодолтой политическэ шиидхэбэри гээшэ гэжэ тэмдэглээ:
- Буряад Уласай Засагай газар болбосоролдо хамаатай орёо асуудалнуудые удаа дараалан ба түсэбэй ёhоор шиидхэhээр: шэнэ hургуулинууд баригдана, шэнэлэгдэнэ. Удаадахи шиидхэбэри - багшанрые дэмжэлгэ, тэдэнэй салин дээшэлүүлгэ, - гэжэ Игорь Марковец тэмдэглэбэ. – Багшанарай бүлэглэл салин нэмэлгэ тухай олон жэлэй хугасаа соо асуудал бодхооно. Хоёр жэлэй саана Арадай Хуралай hунгамалнуудай үүсхэлээр энэ асуудал шиидхэхэ зорилготойгоор Уласай Засагай газарта ажал ябуулха бүлэг байгуулагдаа. Асуудалнууд шиидхэгдэнэ гэжэ мүнөө харанабди. 2019 ондо уласай бюджедhээ багшанарай салин нэмэлгэдэ 413,9 миллион түхэриг hомологдоо. Мүнөө Болбосоролой болон эрдэм ухаанай яаманда багшанарай ажал түлбэриин шэнэ норматив абтагдаа. Тиимэhээ олонхи hургуулинуудта багшанарай салин нэмэгдэхэ. 2021 ондо энэ хэрэгтэ 402 миллион түхэриг үгтэхэ. Түрүүшынхиеэ багшанарай салин түлэлгэдэ 6 миллиард түхэриг бюджедтэ оруулагдана.
- Ээлжээтэ сесси дээрэ хизаарлагдаhан арга боломжотой hурагшадые 2021 оной январиин 1-hээ халуун эдеэгээр хангалга тухай хуулиин түсэл хараалагдаха, -гэжэ Игорь Марковец хөөрэжэ үгэбэ.
