Олониитын бэеын элүүрэй болон үбшэ һэргылгын түб эмнэлгын ухаанай ород-буряад яряанай тобшо дэбтэр бэлдэжэ гаргаа.
Тэрэ эмнэлгын хүдэлмэрилэгшын болон аргалуулагшын харилсаха тон дэлгэрэнги 200 гаран үгүүлэл, холбуулал ба үгэнүүдһээ бүридэнэ. Согсологшод поликлиникэдэасуудаг заншалта асуудалнуудые, эмнэлгын ухаанай гол нэрэ томьёонуудые болон ниитэ хэрэглэгдэдэг үгэнүүдые суглуулбарида оруулаа.
- Тус яряанай дэбтэр гол түлэб эмнэлгын шэглэлэй мэргэжэлтэдтэ хэрэгтэй байха. Эмшэн аргалуулагша хоёр хөөрэлдэхэдөө, бэе бэеэ зүб ойлгохонь ехэ шухала, багаханшье зүйлдэ анхарал хандуулха хэрэгтэй ха юм. Суглуулбариин түрүүшын уншагшад хадаа Буряадай гүрэнэй ехэ һургуулиин эмнэлгын ухаанай колледжын ба дээдэ һургуулиин эмнэлгын факультедэй аха курснуудай оюутад болоо. Бидэ һуралсалай шэнэ жэлэй эхиндэ тэдэндэ бэлэглээбди, - гэжэ үбшэ һэргылгын түбэйхид тэмдэглээ.
Суглуулбариие В.Р. Бояновагай нэрэмжэтэ Буряад Уласай олониитын бэеын элүүрэй болон үбшэ һэргылгын түбэй албан ёһоной сайтһаа абажа, саарһан дээрэ гаргахада, үгы һаа сахим янзаарнь компьютертаа гү, али гар утаһандаа хадагалаад, хэрэглэхэдэ болохо.
- Яряанай дэбтэр ажабайдалда, ажалда хэрэгтэй байхаһаа гадна мэдэсын талаар сэнтэй юм. Хүнүүдэй түрэл хэлээрээ һонирходог болоһон ушарһаа суглуулбари хэлэеэ баяжуулха, мүлихэ хүсэлтэй үргэн зондо туһатай байха, - гэжэ энэ түсэл үүсхэгшэд онсолно.
Уластамнай буряад хэлэ сахин хүгжөөлгэ Буряадай Болбосоролой болон эрдэм ухаанай яаманай зохёон бэлдэһэн программын хэмжээндэ бэелүүлэгдэдэг гэжэ тэмдэглэхэ шухала. Программа гүйсэдхэгшэдэй нэгэн хадаа тус яаманай байгуулһан Буряад хэлэ хүгжөөхэ талаар Улас түрын түб юм. Энээнһээ урид уластамнай буряад хэлэтэй бүхы зоной хэрэглэхэ нэрэ томьёонуудай суглуулбари бүтээгдээ гэжэ һануулая.
