Буряад Уласай Толгойлогшо Алексей Цыденов июниин 20-до шэнээр баригдаһан онкологическо диспансер хүрэбэ. Хирургическа байшанай бодхоогдоһоор, ямар һэлэглэтэ болооб гэжэ эмшэд тодорхойгоор хөөрэбэ. Алексей Самбуевич ябажа хараһанай удаа медицинска түхеэрлгэнүүдые ехэтэ һайшааба. Тус түхеэрэлгэ худалдан абаха хэрэгтэ 5 миллиард түхэриг гаргашалагдаһан юм.
Бүхыдөө 18 мянган дүрбэлжэн метр талмайтай табан дабхартай байшанда хүлеэн абалгын таһаг, эм домоо болон элдэб хэрэгсэлнүүдээ хадагалха газар, түбэй стерилизационна таһаг, 8 операционна танхимтай операционна блог, интенсивна терапиин болон реанимациин таһагууд оршоно. Аргалуулагшадай һанаа үнөөе амаруулха таһагта амяараа сэдьхэл һанаае тэгшэлхэ лама санаартантай уулзан харилсажа байха арга олгогдонхой.
Арга абажа байһан зондо тааруу байхынь түлөө нэгэ, хоёр хүнэй багтаха палатанууд һүүлэй үеын эрилтээр зохёогдонхой.
Арадай Хуралай Түрүүлэгшэ Владимир Павлов мүн лэ энэ ушараар ажаһуугшадые амаршалаа. Үнинэй хүлеэгдэһэн эмнэлгын газар нээгдэбэ гэжэ тэрэ тэмдэглээ.
Буряадай Толгойлогшын дуулгаһаар шэнэ арга боломжонууд бии болобо даа.
-Шэнэ стационарай ашаглалгада оруулагдахада, Улаан-Үдэдэхи Республиканска онкологическа диспансерэй һэльбэн шэнэлэлгын ба хүгжэлтын ехэ түлэб бэелүүлэгдэбэ гээшэ. Хоёр пусковой комплекснүүд ажалаа урид эхилээ һэн: 2013 ондо - конформно лучевэй терапиин түб, 250 хүнүүдые үзэхэ шэнэ поликлиника - 2019 ондо. Нэгэ зэргэ 150 хүниие абажа аргалха аргатай болобо гээшэбди. Эмшэднай энэ үдэр үнинэй хүлеэжэ байгаа, эрдэмээ дээшэлүүлээ. Саашадаа ажалдатнай амжалта хүсэнэб, - гэжэ Буряад Уласай Толгойлогшо Алексей Цыденов хэлэбэ.