Буряад хэлэ сахин хүгжөөхэ гүрэнэй программын хэмжээндэ элүүрые хамгаалгын һалбарида түрэл хэлэнэй хэрэглэмжэ үргэдхэгдэнэ. Восток-Телеинформ мэдээсэлэй агентствын сурбалжалагшада Болбосоролой болон эрдэм ухаанай яаманай Буряад хэлэ хүгжөөхэ талаар түбэй мэргэжэлтэдэй хөөрэһөөр, «Буряад хэлэ сахилга ба эдэбхитэй хэлэнэй оршон хүгжөөлгэ» гэһэн дотор программын ёһоор Элүүрые хамгаалгын яаманда 120 мянган түхэриг үгтөө юм.
Мүнгэнэй зарим хуби Бояновагай нэрэмжэтэ Олониитын элүүр энхын ба үбшэнһөө һэргылгын түбтэ буряад хэлэнэй хэрэглэмжэ үргэдхэхэ хэмжээ ябуулгануудта шэглүүлэгдээ. Тиигэжэ халдабарита үбшэнүүдые һэргылхэ зүбшэл заабаринууд буряад хэлэн дээрэ бэлдэгдэһэн байна. Уураг тархиин шуһа харбалгын, инфарктын шэнжэнүүд ба эхин туһаламжа тухай үнгэтэ уряал зурагууд болон хуудаһанууд, мүн зүбөөр хооллолго, архиин хорон тухай заабаринуудай дэбтэр хэблэгдэжэ тараагдаха.
Мүнгэнэй нүгөө хубинь Буряадай улас түрын хабдар үбшэ эмнэлгын диспансерта байшангуудайнгаа гаршагтай самбарнуудые ород-буряад хэлэнүүд дээрэ бэлдэхынь тула үгтөө.
«Буряад Уласта 2021 – 2030 онуудта буряад хэлэ сахин хүгжөөлгэ» гэһэн программа буряад хэлэ сахиха, хүгжөөхэ ба үүргыень дээшэлүүлхэ зорилгоор зохёогдоһон гэжэ һануулая. Тиигэжэ буряад хэлэ дэмжэлгые олон талата ба эмхи гуримтай болгохо, онлайн-толинуудые зохёожо, буряад хэлэ Интернедтэ шэлжүүлхэ, буряад хэлэндэ һургадаг онол арга зохёохо ба һайжаруулха, мүнөө үедэ таарама шэнэ номуудые бэлдэхэ, буряад хэлэ хүгжөөхэ мэргэжэлтэдые бэлэдхэхэ ажал бэелүүлэгдэнэ.
