Арадай Хуралай гэшүүд һурагшадай багуудай дунда “Серебряный мяч” гэһэн волейболоор Бүхэроссин тэмсээнэй чемпионуудые амаршалаа. Энэ тэмсээн Москва можодо үнгэрөө. Буряад Уласай волейбол наадагшад Пермиин хизаарай, Москва шадархи Химки болон Тюмень можын багуудтай наадажа, тэдэнээ диилэжэ гараа.
Арадай Хуралай түрүүлэгшэ Владимир Павлов тренернүүдтэ болон тамиршадта баярай бэшэгүүдые ба хадагуудые барюулаа. “Тээмэндэ Сочидо үндэр дүнгүүдые харуулһан манай шатаршадуудые бидэ амаршалаа бэлэйбди. Тиихэдэ март һара соо Биробиджан хотодо ДФО-гой шэлэгдэмэл тэмсээн үнгэрөө, тэндэ манай волейбол наадагшад 24 багуудай дундаһаа түрүү байра эзэлээ. Мүнөө Раменск хотодо тэмсээндэ манай тамиршад илалта туйлаа. Буряад Уласай Арадай Хуралай ажалда тамиршадые дэмжэхэ хэрэг онсоанхарал доро байдаг”, - гэжэ Арадай Хуралай түрүүлэгшэ Владимир Павлов эдир тамиршадые амаршалаа.
Арадай Хуралай түрүүлэгшын орлогшо Баир Гармаевай хэлэһэнэй ёһоор, спорт болбол ёһо журам, ехэ харюусалга гээшэ. “Томо болохо бүри хүсэтэй тэмсэгшэд бии болохо. Тиимэһээ тренер Эрдэм Александровичтай хамта үшөө саашаа дабшаха хэрэгтэй. Волейбол болон ямаршье һаа спорт ерээдүйн харгы нээжэ үгэдэг”, - гэжэ тэрэ тэмдэглээ.
