Буряад Уласай Арадай Хуралай Түрүүлэгшэ Владимир Павлов Байгал шадархи аймагай Турунтаево һууринда үнгэрһэн хүдөөгэй үбэлэй спортивна XVI уласай нааданда оролсогшодые мэндэшэлээ.
Владимир Павловай хэлэһэнэй ёһоор, хүдөөгэй спортивна нааданууд бэе бэедээ найрсаг хандаха, үнэн зүрхэнһөө туһа хүргэхэ болон үнэн шударга урилдаха гэһэн һайхан уур амисхалтай байдаг гээшэ. “Энэ ехэ үйлэ хэрэг болбол олоной анхарал татана, харин эндэ оролсохо гээшэ уласай хүдөө аймагуудай ажаһуугшадта ехэ үйлэ хэрэг гэжэ тоологдодог. Наадан элдэб наһанай хүнүүдые нэгэдүүлжэ, олоной спорт болон бэеын тамирай соёл хүгжөөхэдэ, элүүр мэндэ ажамидаралые тараан дэлгэрүүлхэдэ тон ехэ нэмэри оруулдаг. Байгал шадархи аймагта хүдөөгэй наада үнгэргэхын урда тээ спортивна барилгануудые бэлдэхэ, спортын объектнүүдэй эд хэрэгсэлэй-техникын бааза бата бэхи болгохо ажалнууд хэгдээ. Энэ ехэ зөөри аймагай ажаһуугшадта үлэнэ. Байгал шадархи аймагай бүхы ажаһуугшадта энэ ехэ бэлэг болоо”, - гэжэ уласай парламентын дарга өөрынгөө элидхэл соо тэмдэглээ юм.
Байгал шадархи аймагһаа Буряад Уласай Арадай Хуралай һунгамал Дмитрий Дружинин иигэжэ тоолоно гэбэл, хүдөөгэй спортивна наада үнгэргэлгэ болбол аймагай спортивна хэмжээ ябуулгануудай эгээл шухалань болоно. Нёдондо жэл энэ наадан болохо байгаа, харин хизаарлалтын болоһон ушарһаа хойшолуулагдаһан байгаа гэжэ тэрэ һануулаа.
