Арадай Хуралай hунгамал Михаил Гергенов Улаан-Yдэдэ өөрынгөө hунгуулиин округ дээрэ хоёр шэнэ hургуулиин стадион барилгын ябалгатай танилсаба. 38-дахи юрэнхы болбосоролой дунда hургуули Кирзавод дээрэ хуушан автотранспортна предприятиин байшан соо оршодог, тиимэhээ эндэ спортзал үгы гээшэ. Физкультурын хэшээлнүүд газаа үнгэргэгдэг, hурагшад тааралдуулhан талмай дээрэ гарадаг.
Һургуулиин захирал Валентина Турунхаевагай хэлэhээр, hуралсалай шэнэ жэлдэ мүнөө сагай шэнэ футболой талмай, гүйдэлэй зүргэ ба трибуна бии болохо.
- Энэ жэлдэ Арадай Хуралай hунгамал Михаил Денисович Гергеновай hайгаар уласай бюджедhээ манай стадионай hэльбэн шэнэлгэдэ 8 миллион түхэриг hомологдоо. Ехэнхи ажал дүүргэгдэнхэй. Мүнөө поли дээрэ ногоон хушалта дэлгээлгын бэлэдхэл хэгдэнэ. Гүйдэлэй зүргэ резинын бутархайгаар хушагдаха, - гэжэ тэрэ хөөрэбэ.
Загорск hууринда 22-дохи hургуулиин стадионой барилга май hарада «Строительство федеральных оздоровительных комплексов» гэжэ холбоото уласай программаар эхилэнхэй.
- Контракт 28 миллион түхэригэй болоно. Эндэ бүхэли физкультурна-оздоровительна комплекс бии болохо: футболой ехэ ба бага полинууд, хоккей наадаха хорой, волейболой, баскетболой, бага үхибүүдэй талмайнууд. Тойроод байhан гэрнүүдэй зон ехэ багагүй булта эндэ сугларха гэжэ найданабди, - гэжэ Михаил Гергенов тэмдэглээ.
Һургуулиин стадион ТГК-14-нэй котельнын үнэhэнhөө заатагүй халхалха хэрэгтэй гэжэ Дээдэ Хуралай гэшүүнэй онсолhыень Восток-Телеинформ парламентын мэдээсэлэй албанhаа дуулгана.
