Арадай Хуралда Байгал далайе хамгаалгын асуудалаар зүблөөн үнгэрбэ. Дээдэ Хуралай түрүүлэгшэ Владимир Павлов зүблөөнэй нээлгэн дээрэ Ород Улас дотор байгаали хамгаалгын гүрэнэй нэгэдэмэл политикэ эрхэ хуулиин хангалгатай байха ёhотой гэжэ хэлэбэ. Байгал шадарай байгаалиин дэбисхэрэй гол экологическа бүhэлүүртэ табигдаhан хорюулганууд ба хизаарлалганууд нютаг засагай байгууламжануудай социальна - экономическа хүгжэлтэдэ нүлөө үзүүлнэ, тиимэhээ Буряад Уласай 78 мянган ажаhуугшадта сэхэ хабаатай гэжэ элидхэл соогоо тэмдэглээ.
- Мүнөө сагта Байгал далайе хамгаалха асуудалаар Байгал далайн дэбисхэрэй байгаалиин баялигуудые хэрэглэлгын ба нютаг можын хүгжэлтын талаар эрхэ хуулиин хэмжээнэй үндэhэ hуури бэлдэгдээ, -гэжэ хуралай түрүүлэгшэ хэлэбэ.
Далайн эръе дээрэ ажаhуугшад хорюулгануудтай ба хизаарлалгануудтай ходо ушарна гэжэ Кабанскын аймагhаа hунгамал Валерий Кочнев хөөрэнэ. Арадай Хуралай hунгамалнуудта энэ асуудалаар тодорхой баримталhан бодол бии.
Экономическа политикын, байгаалиин нөөсэ баялигуудые ашаглалгын ба тойронхи оршон хамгаалгын хорооной түрүүлэгшэ Анатолий Кушнаревай тэмдэглэhээр, эгээл тааруу зохид түхэл – байгаалияа сахин, Байгалай дэбисхэр дээрэ «ногоон технологи» нэбтэрүүлэн, экономико хүгжөөлгэ. Иимэ экономико хүгжөөхын тула Байгалай нютаг можонуудта газ таталга, зайн галай тариф доошолуулга хэрэгтэй болоно.
