Улаан-Үдэдэ агаарай бузарлагдахаһаа зарим тэды бага зэргын котельнонуудые хааха түсэб табигдана. Энээн тухай Арадай Хуралда үнгэргэгдэһэн дүхэриг шэрээ дээрэ Улаан-Үдэ хотын ажахын хорооной түрүүлэгшэ Константин Мошковский дуулгаба. Тэрэнэй үгөөр, хото дотор элдэб эсын түлишээр хэдэн мянган гэрнүүдэй дулаасуулагдахаһаа оло мянган тоонно тортог агаарта хаягдана, энээнһээл боложо, агаарай ариг байдал хохидоно бшуу.
- Манай муниципал мэдэлэй 37 котельно тоологдоно. Харин бүхыдөө Улаан-Үдэдэ агаар бузарлагша зуу гаран котельно хүдэлнэ. Гэхэтэй хамта, үмсын гэрнүүд тон ехэ хохидо үзүүлнэ гэжэ шэнжэлэлгэнүүд харуулаа. Жэшээнь, Бабушкинай гудамжаар үмсын олон гэр баригдаатай. Тэндэ газаа гаража амилхын аргагүй, - гээд Мошковский хубаалдаба, - Энэ сагта багахан котельнонуудые хаагаад, гэрнүүдые ехэ котельнонуудта холбохо ажал ябуулагдажа байна. Агаар шүүдэг хэдыш шанга түхеэрэлгэнүүдые табяа һаамнай түлишыншье болоод дулаасуулгын тогоонуудай шанарһаа ехэнхи юумэн дулдыдана.
Мошковский ойлгуулһаар, олонхи тогоонууд модоной хара нүүрһөөр түлэгдэхэ ёһотой аад, һураггүй «шэмэ хоолтойһоо» хүсэд шатадаггүй Түгнын шулуу нүрһээр түлэгдэнэ, тиимэһээ бүри үдхэн утаан дээшээ хаягдана. Бэрхэтэй иимэ үзэгдэл Загорск тосхондо илангаяа хабаатай. Энээниие усадхахын тула хотын засаг зургаан утаан хаядаһа шүүхэ, тэрэшэлэн шулуу нүүрһэнэй үнэһэ богой байрануудые шэглэн бүтүүлхэ шиидхэбэри гаргаха түсэбтэй.
Бэе махабадта харша хаядаһатай гэжэ авто унаанай таглаанууд гэжэ дүхэрин шэрээдэ хабаадагшад һанамжалаа. Константин Мошковскийн дуулгаһаар, автохаргынуудай урасхал гуримшуулха тухай тусхай түсэл энэ сагта зохёогдоно. «Бидэ мүнөө харгын найман таһардаһа үргэдхэхэ түсэбтэйбди, тэрэ тоодо Дээдэ Онгостой, Силикатный тосхон», - гээд тэрэ хөөрэжэ үгөө.
