Барилгашанай һайндэртэ зорюулагдаһан баяр ёһололой хэмжээ ябуулга Буряад Уласай засагай газарта үнгэргэгдөө. Буряад Уласай Засагай газарай Түрүүлэгшын нэгэдэхи орлогшо Всеволод Мухин барилгын һалбариин түлөөлэгшэдые мэргэжэлтэ һайндэрөөрнь амаршалаад, эрхим хүдэлмэрилэгшэдтэ шагналнуудые барюулаа гэжэ Буряад Уласай Засагай газар мэдээсэнэ.
- Һанал бодолһоо эхилээд, түсэл бэелүүлэгдэтэрнь, барилгашад бүхы юумэн бүтэхэ аргатай гэжэ гэршэлнэ. Барилгашадай бодхооһон зүйлнүүд мүнөөдэр нюдэндэ һайшаагдана. Бэеэ зорюулһандатнай баярые хүргэхэ хүсэлтэйб, үдэр бүриин ажалдатнай амжалта хүсэнэб, - гэжэ Всеволод Мухин хэлэбэ.
2019 онһоо хойшо улас дотор 31 һургуули, хүүгэдэй 43 сэсэрлиг, мүн спортын, соёлой болон элүүрые хамгаалгын 102 объект баригдаһан байна. 2,5 сая дүрбэлжэн метр гэр байранууд ашаглалгада тушаагдаа, 28 шэнэ түбшүүлһэн уһаар хангалгын байгууламжанууд бэелүүлэгдээ. Гэр байрын барилга эдэбхитэйгээр Буряад Улас нэгэтэ бэшэ федеральна хэмжээндэ тэмдэглэгдээ. Аварийна гэрнүүдһээ 6,8 мянга гаран хүн нүүлгэгдэжэ, капитальна заһабарилгын жаса олон байратай 2500 гаран гэрнүүдые заһабарилаа. Капитальна заһабарилгада 200 гаран барилгын эмхинүүд хабаадажа байна, тэдэнэй эрхимүүд мүн лэ хүндэлэлэй грамотануудта хүртөө.
