Буряад Уласай Хурумхаанай аймагта харгын хоёр объект ехэ заһабарилгын һүүлээр баяр ёһололой оршон байдалда нээгдээ. Байгша ондо уласай хүрэжэ ошоходо холын нютагуудай нэгэндэ инфраструктурын шухала хоёр объект нэгэ доро шэнэлэгдээ: «Аюулгүй шанартай харгынууд» гэһэн гүрэнэй үндэһэн түсэлөөр Могойто-Май авто-зам дээрэхи Гаарга гол дээгүүрхи хүүргэ болон «Хүдөө нютагуудые комплексно хүгжөөлгэ» гэһэн гүрэнэй программаар Хурумхаан һууринда гудамжа шэнэлэгдээ гэжэ Буряад Уласай Тээбэриин яаман мэдээсэнэ.
- Буряад ороной аймаг бүхэндэ аятай зохид, аюулгүйгөөр ябалга хангагдаха ёһотой, федеральна түсэлнүүдэй бэелүүлэгдэһэнэй ашаар энэ арга боломжотой болоо. Харгынуудые стандартна байдалда оруулха талаар ажал ерэхэ жэлдэ үргэлжэлхэ гэжэ Буряад Уласай унаа тээбэриин, элшэ хүсэнэй болон харгын ажахы хүгжөөлгын сайд Александр Гоге хэлэбэ.
Хурумхаан тосхоной Школьная гудамжаар 860 гаран метр утатай харгы шэнэлэгдэһэн байна. Шэнэ асфальт, тэмдэгүүд, уһа зайлуулха һубагууд, хашаанууд бии болоо. Хүдөөгэйхидэй аятай зохид байхын тула, аюулгүй байдалай хэмжээ дээшэлүүлхын тула харгын ажалшад тротуарнуудые, автобусай зогсохо газар бариһан, светофорнуудые, гэрэлтүүлгын түхеэрэлгэнүүдые тодхоһон байна. Тус объектын сэн 39,1 сая түхэриг болоо. Түсэл бэелүүлгэдэ тойрогой түншэд хадаа 3 сая тухай түхэриг һомолһон «Озёрное» компани, 1,15 сая түхэриг һомолһон «Дорожник» гэһэн подрядна эмхи болоно.
