Олзын хэрэг эрхилэгшэ– дэлгүүрнүүдтэ, офисуудта хуурай хатуу коммунальна хаядаһа гаргаха тогтомол шэнэ сэнгүүд 2023 оной майн эсэс болотор бэлдэгдэхэ. Тиимэ шиидхэбэри Буряад Уласай Арадай Хуралай ажалай суглаан дээрэ абтаа юм.
Эдэй засагай, байгаалиин баялиг ашаглалгын болон экологиин талаар хорооной түрүүлэгшын орлогшо Егор Олзоевой хэлэһэнэй ёһоор, улас даяар эхилэһэн хог хаядаһанай шэнэдхэл болбол уласта бэлэн бэшэ үнгэрнэ, тиимэһээ Улаан-Үдэ хотын болон уласай олзын хэрэг эрхилэгшэд “Экоальянс” нютаг можын оператортай арсалдаатай байһан ушарһаапарламент руу хандаһан байгаа. “Контейнерэй өөрын талмай үгы һаа, эзэлжэ байһан байрын талмайһаа тоологдоһон байбашье,тэдэндэ үнэ сэнгынь хэтэрмэ ехэ байна”, - гэжэ Олзоев хэлээ.
Хүршэ нютаг можонуудта – Эрхүү можодо, Үбэр Байгалай хизаарта доошолуулаглаһан шэнэ үнэ сэнгүүд абтажа, хүсөөндөө оронхой юм. Парламентын байшан соо энэ удаа шангахан хөөрэлдөөн болоо. Нэгэ талань “Экоальянсын” ажалда бэрхэшээлнүүдэй байһан тухай хэлээ. Һүүлэй һүүлдэ Буряад Уласай байгаалиин нөөсэ баялигай сайд Наталья Тумуреевада майн эсэс болотор ТКО ажаллаха талаар шэнэ сэнгүүдые тооложо гаргаха даабари үгтөө, тэрээндэ тэрэ зүбшөөрһэн харюу үгөө юм.
