Арадай Хуралай hунгамалнууд шоно бариhанай түлөө түлбэриин мүнгэ дээшэлүүлхэ тухай асуудал табиба. Арадай Хуралай вице-спикер Цырен-Даши Доржиев февралиин 25-да ээлжээтэ гүрэнэй дээдэ хуралай сесси дээрэ энэ орёо асуудал бодхообо. «Жэл бүри Буряад Уласай аймагуудта шонын тоо олошорно, ангуушадай гаргаша баhа дээшэлнэ. Мүнөө сагта ангуушадта түлбэри тэдэнэй гаргашыень ханганагүй, -гэжэ Доржиев Ц-Д тэмдэглэбэ.
Нютагай өөhэдын хүтэлбэринүүд байра дээрээ бага бюджедтэй шалтагhаа энэ түлбэри нэмэхэ аргагүй, тиигэбэшье Буряад Уласта иимэ жэшээнүүд бии. Зэдын аймагта ангуушадта нютагай бюджедhээ түлбэри нэмэхэ гэжэ шиидхэбэри абтаhан байна, харин Хурал хажуу тээhээ хараад байха ёhогүй. Энэ түлбэри нэмэхэ саг болоо,- гэжэ вице-спикер онсолон тэмдэглээ.
Мүнөө хабарай сагта хүдөөгэй ажахынуудай түл абажа байhан үедэ адууhа мал арьяатанай урда бүришье шадалгүй. Абаhан түлөө hайн хаража шадаагүй hаа, малай тоо олон болохо гэжэ найдал байхагүй.
- Шононуудай тоо олон, тиимэhээ мяха үйлэдбэрилдэг ажахынуудай хүгжэлтэдэ hаад ушаруулха байна. Засагай, хүдөө ажахын яаман энэ орёо асуудалда анхаралаа хандуулхыень, Хуралай хүдөө ажахын хороондо хиналта дороо абахыень дурадханаб, - гэжэ Доржиев тэмдэглээ.
Зэдын аймагай ангуушадта шонын түлөө түлбэри 11 мянган түхэриг хүрэтэр нэмэгдэбэ гэжэ Восток-Телеинформ февралиин эхеэр дуулгаhан байна. Аймагай фермернүүдтэй суглаанай үедэ шононуудай малда добтолго олошороо гэжэ элирүүлгэдэhэн. «Шонын хүдөө нютагуудта оролго ба малда добтолго hүүлшын хоёр жэлэй туршада хоёр – гурба дахин олошороо. Шоно хюдалгын ажал ехэ хүндэ, гаргаша ехэтэй гэжэ мэдээжэ, тиимэhээ энэ хэрэгтэ мүнгэн түлбэри нэмэлгэ шонын тоо үсөөрүүлхэ ангуушадта гол урмашуулга болохо. Манай шухала зорилго хадаа – нютагайнгаа зоной аюулгүй байдал хангалга болоно, -гэжэ Зэдын аймагай гулваа Валерий Цыренов хэлэhэн байна.
Жэл бүхэндэ шононууд малда добтолно, илангаяа адуунай, хониной, гахайн түл эдэнэй hабарта ороно гэжэ уласай аймагуудай фермернүүд гомдол баридаг.
