Октябриин 20-до, гарагай 3-да Алексей Цыденов шэнэ эмнэлгын түхеэрэлгэнүүдтэй унаануудай түлхюурнүүдые аймагуудай түбэй эмнэлгын газарнуудай ахамад эмшэдтэ барюулба. «Элүүрые хамгаалга» гэhэн үндэhэн түсэлөөр абтагдаhан 18 шэнэ эмнэлгын түхеэрэлгэнүүдтэй унаанууд уласай эмнэлгын эмхинүүдтэ – Баргажанай, Бэшүүрэй, Яруунын, Загарайн, Ивалгын, Кабанскын, Хурамхаанай, Муяын, Байгал Шадарай, Тарбагатайн, Хориин аймагуудай болон Нижнеангарск, Гусиноозёрск хотонуудай, Петропавловка тосхоной түбэй эмнэлгын газарнуудта дамжуулагдаба.
-Эмнэлгын туhа хүргэлгэ арад зондо бүри дүтэ болоно. «Элүүрые хамгаалга» гэhэн үндэhэн түсэлөөр бүхы Буряад Уласай эмнэлгын газарнуудай материальна-техническэ база шэнэлэгдэнэ. Долоон хоногой туршада түргэн туhаламжын 18 унаа аймагуудта дамжуулагдаа, тэдэнэй тоодо 13 флюороографууд, 5 маммографууд. Тиимэhээ, муу харгытай холын нютагуудта ошожо, дээдэ зэргын туhаламжа хүргэгдэхэ болобо. Иимэ эмнэлгын шэнэ оньhон түхеэрэлгэнүүд бидэндэ хэрэгтэй, энээниие бидэ «Элүүрые хамгаалга» гэhэн юрэнхылэгшын программаар абабабди. Энэ оньhон түхеэрэлгэнүүдэй туhаар хүн зоной бэеын шалгалта дээдэ хэмжээндэ гүйсэд хэгдэхэ, үбшэн саг соогоо элирүүлэгдэжэ, эрхэтэнэй элүүр энхые аршалха ба ами наhа абархада ехэ хэрэгтэй, - гэжэ уласай толгойлогшо А.Цыденов тэмдэглэбэ.
КАМАЗ түхэлэй машинанууд дээрэ 5 маммографиин аппарат, лаборантын кабинет, 8 терабайт хэмжээнэй снимогуудые багтааха түхеэрэлгэнүүд тотодхогдонхой. Рентгенэй элшэhээ аршалха кабинатай 8 флюроографи гаргаха түхеэрэлгэнүүдтэй кабинетнүүд, бүхы хэрэгтэй түхеэрэлгэнүүдтэй рентгенолог эмшэнэй ба рентгенолог лаборантын таhалгануудтай. Энэ комплекснууд соо гүйсэд эмнэлгын хэрэгсэлнүүдээр: мебель, вентиляци, халуун уhан, дизель дээрэ дулаасуулгын түхеэрэлгээр хангагданхай. Энэ түхеэрэлгэнүүдтэ хамта дээрээ 131 миллион 121,6 мянган түхэриг hомологдоо.
Түрүүшын иимэ хоёр комплекснүүд 2018 ондо Кабанскын ба Баргажанай түбэй эмнэлгын газарнуудта дамжуулагдаhан байна гэжэ hануулая. Энэ техникэ «Элүүрые хамгаалга» гэhэн үндэhэтэнэй түсэлөөр Холбоото уласай бюджедhээ абтана. Хамта дээрээ Буряад Уласта энэ түсэлөөр 7 нютаг можын хоорондохи түсэлнүүд бэелүүлэгдэхэ. 2024 он болотор 21 миллиард түхэриг хараалагданхай. 2019-2021 онуудта 2,5 миллиард түхэриг hомологдохо.
