Буряад уласта хүүгэдэй технопарк байгуулха түсэб табигдаба. Толгойлогшын ба Засагай Газарай хэблэлэй албанай мэдээсэһээр, Ородой Холбоото Уласай юрэнхылэгшэ Владимир Путин Гүрэн түрын Суглаанда хандаха дээрээ Ородой Холбоото Уласта хүүгэдэй 40 технопарк байгуулха даабари табиһан байгаа. Буряад орондо энэ талаар ажал ябуулагдажа эхилэнхэй, онол эрдэмэй түбүүд ганса ниислэлдэ бэшэ, хүдөө аймагуудташье бии.
Эгээл тиимэ хоёр томо түбүүдые Буряадай толгойлогшо Вячеслав Наговицын эрьежэ хараһан байна - нэгэниинь Эрдэмэй бага академи, нүгөөдэнь эдир халаанай «Созвездие» гэжэ түб мүн болоно. «Манай эндэ энэ ажал яһала эршэтэй эхи абанхай. Гэбэшье, бэеэ данги, хүсэд түгэлдэр технопаркнуудые байгуулха шухала. Тэндэ улас түрын хэмжээндэ багшанарыешье бэлдэхэдэ, илангаяа эрдэмэй онолнуудаар хүүгэдыешье һонирхуулха арга олгуулха нэмэри һуралсал нэбтэрүүлхэдэ ехэ таатай байха.», - гээд тэрэ һанамжалаа.
2002 онһоо хойшо эрдэмэй бага академи БГУ-гэй университедэй һуралсалай бүридэлдэ оруулагданхай, тиин 12 факультедудэй дэргэдэ хэшээлнүүд үнгэргэгдэг байна. Шабинар Зүүн-Сибириин гүрэнэй технологическэ университедэй лабораториинта эрдэм мэдэсэеэ нарижуулан шудална. «Созвездие» түбэй хүмүүжэмэлнүүд амжалтануудаа мүн лэ харуулхые оролдоо. Тэндэ 2012 оной январь соо робот-техникын кружок нээгдэһэн байгаа. Һурагшадай энэ зүйлөөр һонирхоһониинь дэмы бэшэ. Тэрэ жэлэй апрель соо тэндэ техническэ бэлиг мэдэсын таһаг байгуулагдаа. 2012 оной сентябрь соо радиоэлектроникын кружок нээгдэбэ, зүгөөр улам шанартай һуралсал абахын тулада Челябинск хотодо байрлаһан «Робот-техникын улас можо дундын һуралсалай түбтэй» болоод Красноярскын гүрэнэй политехническэ университедтэй хэлсээнүүд баталагдаба. Тиигээдшье «Созвездие» хамтарал Буряад орондоо өөрын таһагуудтай юм.
Ород гүрэнэй юрэнхылэгшын даабаряар, ямар нэгэ кружогто ябаха арга олгуулха тусхай сертификат үхибүүн бүхэндэ гүрэнэй талаһаа үгтэхэ ёһотой.
